Ardi Asllani, stili i beqarisë së lumtur!

Rendit shumë të mira që shijon prej të qenit single. Të këqijat as që i njeh fare. Ndihet rehat dhe i përkëdhelur prej jetës që bën, por dhe prej njerëzve të afërt që e rrethojnë. Ndaj e thotë qetësisht me bindje se, nëse martesa do të vijë si etapë jetësore, mirë se të vijë. Nëse jo, mos ardhtë kurrë, se është shumë mirë edhe pa të. Ky është rrëfimi i një tjetër personazhi single në këtë qytet…i stilistit Ardi Asllani.

Me kë jeton?

Me familjen time të vogël… mamanë dhe motrën time.

Cila është gjëja më e bukur e të qenit single?

Uuuu sa shumë gjëra të bukura ka, por vërtet nuk di nga t’ia nis. Po ja, për shembull: marrja e vendimeve i vetëm, liria… Nuk kam arritur kurrë ta kuptoj tekstin e këngës ”zgjohem në mëngjes me afshin tënd”, sepse kam kuptuar që afshi zgjat për pak kohë dhe më pas kthehet në aromë dhe aromat jo gjithmonë janë të këndshme!
Po gjëja më e keqe?

Pse ka gjëra të këqija??! Me siguri këto janë legjenda urbane, thurur nga ata të cilët sapo kanë nisur “betejën martesë” dhe nuk dinë nëse do dalin fitues prej saj. Rreziku për të qenë humbës është i madh.
Ç’do të thotë të jesh single?

Një status, i cili të vë në qendër të vëmendjes, ku ti mendon për veten dhe të tjerët mendojnë për ty. A ka më bukur se kaq?!
A ke dalë në “blind date”, në takim të sajuar nga të tjerët me dikë që nuk e ke njohur më parë?

Me dijeninë time jo, por do t’ju rrëfej që miqtë janë munduar të më ngrenë rrengje të tilla në të cilat kam rënë, por kjo ka zgjatur shumë pak dhe fatkeqësisht them kështu sepse nëse personi tjetër që është bërë pjesë e rrengut ka ngjallur interes fillimisht, në momentin që është zbuluar gjithçka ka rënë dhe ka mbetur në nivele grackash.
Si ka përfunduar?

Ka përfunduar pa filluar dhe kjo histori, si shumë të tjera, të cilat nuk kanë pasur si pikënisje iniciativën personale.
Kush e ka “problem” beqarinë tënde?

Në një rast të tillë do mendohet që janë familjarët ata të cilët e ngrenë këtë “problem”, por ju betohem që vetëm ata nuk ma kanë zënë kurrë në gojë. Por ka plot të tjerë, të cilët i janë futur “valles martesë” dhe kërkojnë bashkëshoqërues për të hequr këtë valle deri në fund. Por në jetën time kam një parim: “I mbyturi të mbyt” J.
Mbrëmjet e tua tipike të fundjavës si janë?

Asnjëra nuk ngjan me tjetrën, sepse këtë ka të bukur të qenit single, të mban larg monotonisë. Por duke menduar se për çdokënd fundjava e një beqari përkthehet jetë nate, unë i përgjigjem: Jo, kategorikisht jo! Mund të jetë fundjavë jashtë qytetit, fundjavë me një libër, fundjavë e shkuar dëm përpara televizorit, por një gjë është e sigurt, që kur je single nuk kalon kurrë fundjava kundër dëshirës tënde, ndërsa duke qenë i martuar do të duhet të bësh kompromise, qoftë dhe për të kënaqur dëshirat personale të partneres.
Në ç’orë kthehesh në shtëpi kur del natën?

Vonë, shumë vonë, në orët e para të mëngjesit.
Kur e ke dëgjuar për herë të parë urimin “me një fat të mirë” ose “në dasmë”?

Në traditën shqiptare ky është një urim të cilin e dëgjon herët, shumë herët, ndoshta dhe pa ndonjë qëllim përfundimtar, por më kujtohet që sa herë na e thoshin, mua dhe sime motre, përgjigjja ishte e menjëhershme: Ne nuk do të martohemi!!! Kundërpërgjigjja ish: Ju që thoni kështu, e keni pas dere, sa të bëni 20 vjeç. Por ja pra ku jemi dhe pas kaq e kaq kohësh dhe ne i qëndrojmë stoik thënies sonë të atëhershme…
Çfarë mendon nëse e dëgjon edhe sot e kësaj dite?

Them me vete: Sa mirë që në këtë botë ka njerëz që urojnë e mendojnë mirë, por sa keq për ta që s’e kuptojnë sa plot ndihem unë me veten time, me punën që bëj, qoftë dhe me ata vetë që më rrethojnë e bëjnë ditën time.
Shumica e miqve dhe mikeshave të tua janë të martuar apo single?

Ka të martuar, por ka dhe shuuuuumë single, të cilët, profesionistë të zotë, kërkojnë ende të realizohen dhe të përsosin karrierën e tyre. Por më duhet të cek se në shoqërinë tonë nuk infektohemi shpejt J!
Sa shpesh fton njerëz në shtëpi?

Shumë rrallë, sepse dhe vetë më jep bezdi të madhe të shkoj në shtëpitë e të tjerëve. Ka vende plot ku mund të kalojmë dhe 24 orë me miqtë tanë. Për këtë shërbejnë fundjavat jashtë qytetit, pushimet etj. Shtëpia është për mua dhe vetëm për mua. E di që është pak egoiste, por unë kështu jam.
Për çfarë shpenzon më shumë?

Për veten time. Ende nuk kam fëmijë që të kthehen ata qëllimi kryesor jetësor. Janë udhëtimet, blerjet gjërat që m’i boshatisin portofolet.
Sa shpesh gatuan?

Prej 6 vitesh që jetoja në një shtëpi të re, m’u desh të përballesha me thekësen e bukës, të cilën zbulova se nuk dija ta përdorja. Jam djalë i vetëm i një nëne të përkushtuar në maksimum dhe i dy motrave më të mëdha, të cilat janë kujdesur me detaje që të mos zë kurrë gjë me dorë në kuzhinë J.
Cili është specialiteti yt?

Që ma gatuajnë të tjerët, se specialitet timin nuk kam, sepse siç thashë më lart nuk di të gatuaj, por tanimë që kam shtuar në peshë jam bërë shijues i mirë!
A të ka ndodhur të gatuash ndonjëherë vetëm për vete?

Më është dashur të qëndroj për disa ditë i vetëm në shtëpi dhe pas ditës së tretë mora rrugën dhe unë për pushime. Ishte e pamundur, përdora çdo numër shërbimi Taxi dhe u ushqeva me ç’të mundesha nga restorantet e Tiranës, por çdo gjë e ka një limit. Llastimi i tepërt ka sjellë një “produkt njeri” që nuk di të skuqë as një vezë.
Cilin nga këta numra shërbimesh ke në celular: taksi, ambulancë, polici, elektricist, hidraulik, shërbim taksi?

Asnjërin në fakt, sepse nuk jetoj vetëm dhe shumicën e këtyre “halleve” ma zgjidhin të tjerët, kryesisht ime motër. Falë saj, e kam jetën më të lehtë.
Deri kur do vazhdosh të jesh single?

Është njëlloj si të pyesësh një të martuar sa do të vazhdojë të jetë i martuar. Nuk jam kategorik në këtë gjë, por nuk jam as në kërkim të dëshpëruar. Nëse do të vijë si etapë jetësore, mirë se të vijë; nëse jo, mos ardhtë kurrë, se jam shumë mirë dhe pa të. Gazeta MAPO