Kuq e Zi, feston Kosova!

Kuq e zi dhe e bashkuar ndihet sot krenare Prishtina e vetë qytetarët e saj, të cilët shoqërohen nën ritmin e tupanave dhe manifestimeve të ndryshme. Kjo me rastin e festës së 28 nëntorit, ditës së pavarësisë së Shqipërisë, 101 vjet të këtij shteti amë e të lirë, daljen publike në skenë të Ushtrisë Çlirimtare të Kosovës, si dhe datëlindjen e komandantit legjendar, Adem Jashari.

28 nëntori është dita e data që tregon përafrimin e shqiptarëve, siç thekson edhe gruaja e lumtur, me buzëqeshjen e saj të lehtë në fytyrë.

“Shqipëria, Kosova kemi një lidhshmëri edhe më të madhe sot. Jemi të bashkuar për një kulturë edhe më të mirëfilltë, edhe më të përbashkët, më të ngushtë”, pohoi Rukije Dervishi.

Në anën tjetër, një qytetar i moshuar përshkruan ndjenjën se si shqiptarët më parë nuk kanë pasur të drejtë të vendosin flamurin kombëtar.

“Ne, në të kaluarën nuk kemi pasur të drejtë të vendosim flamurin kombëtar, përderisa sot po”, ka thënë Hysen Maliqi.

Kjo është dita kur edhe të rinjtë me flamuj mbi krahët e tyre shprehin ndjesinë e atdhetarisë dhe të epokës së lavdishme të shqiptarëve. Siç thotë Shkumbin Latifi, se është shumë i lumtur dhe ndihet krenar me ngjyrën kuq e zi, përderisa me këtë ngjyrë edhe Rita Dervishi, një vajzë e re, ka përzgjedhur stilin e saj të festojë me familjen e të afërmit e saj, e cila thotë se ngjyra e kuqe e flamurit është e veçantë, mbase simbolizon gjakun e dëshmorëve.

Edhe fëmijët tanë sot ndihen të lirë, duke shëtitur lirë.

“Dal shetitna, kuq e zi”, thotë Aulon Spahiu.
Kjo është festa e cila bën që kurrë të mos shuhen meritat e atyre që kontribuuan duke dhënë jetët e tyre, duke sjellë liri.

Me rastin e kësaj feste redaksia e gazetës ‘Bota sot’ uron të gjithë shqiptarët kudo që janë. Gëzuar, Kuq e zi!