Shqiptarët, fisnikët mes kombeve

Kjo është një ekspozitë e një epoke të errët të njerëzimit, që u tronditë nga shfarosja e hebrenjve, atëherë në Kosovë gjetën strehim mbi 400 familje hebrenjsh.

Ekspozita me fotografi të ndryshme që kujton ditët e tmerrit të hebrenjve nga fashizmi dhe mikpritjen dhe bujarinë që gjetën tek shqiptarët edhe në Kosovë. Në këtë ekspozitë e cila do të qëndrojë shtatë ditë e hapur shohim foto të shtëpive të hebrenjve në Prishtinë, foto hebrenjsh nga burgu i Prishtinës gjatë Luftës së Dytë Botërore, foto të Hysni Domit, tregtarit gjakovar që kishte ruajtur thesarin me ar dhe stoli të mikut të tij hebre David Levi, foto të Hasan Rremës, Mustafë Rezniqit dhe të tjerëve nga Gjakova që u kishin dalë në ndihmë hebrenjëve, pastaj të Arif Aliçkajt nga Deçani që në ato kohë rreziku kishte strehuar në konakun e tij hebre të rrezikuar nga shfarosja e të tjera fotografi të kohës që kujton kërcënimin me zhdukjen e hebrenjve që ndaj tyre i kishin hapur zemrat dhe dyert edhe shqiptarët.

”Kjo është një ekspozitë e një epoke të errët të njerëzimit ku më së shumti i rrezikuar ishte populli i lashtë hebre të cilët u tronditën deri në shfarosje. Atëherë në Kosovë gjetën strehim mbi 400 familje hebrenjsh dhe në saje të asaj ndihme me titullin “Fisnik mes kombeve” është nderuar familja Rezniqi, me prejardhje gjakovare që sot jetojnë në Prishtinë” ka thënë Bardhyl Oseku, udhëheqës i sektorit të kulturës, e cila ka qenë mbështetëse e kësaj ekspozite. Lekë Rezniqi, si trashëgimtar i familjes që kishte rrezikuar shumë në dalje ndihmë hebrenjve ka përkujtuar se vitin që shkoi një shesh në Gjakovë është emërtuar me emrin e Tom Lantoshit, këtij personazhi që bëri shumë për çështjen e Kosovës ndërsa Votim Demiri nga komuniteti i hebrenjve të Kosovës duke shprehur mirënjohjen e tij ka pohuar se “inteligjenca dhe zemërgjerësia e popullit shqiptar u shndërruan në një inteligjencë politike”. Ekspozita është hapur me rastin e 1-vjetorit të dekorimit të familjes Rezniqi me titull “Fisnik mes kombeve”, ne pesë vjetorin e themelimit të shoqatës së miqësisë Kosovë-Izrael ”Dr.Haim Abravanel” si dhe në kujtim të veprimtarit të shquar të çështjes shqiptare, Tom Lantosh.