Kelmendi shkruan historinë, fiton Kampionatin Botëror

Xhudistja kosovare, Majlinda Kelmendi, ka arritur ta fitojë medaljen e artë në Kampionatin Botëror që po zhvillohet në Rio de Janeiro, duke e mposhtur në finale brazilianen Erika Miranda.
Siç edhe u prit, Kelmendi pati punë jashtëzakonisht të vështirë ndaj Mirandës e cila konsiderohej pak më shumë favorite se xhudistja jonë.

Mirëpo, kjo nuk i bëri përshtypje xhudistes sonë e cila ishte plotësisht e koncentruar dhe e dinte shumë mirë se për çka kishte marrë pjesë në këtë kampionat. Gjatë gjysmës së luftës, Majlinda arriti ta hedh në tokë Mirandan me një ‘wazzari’ dhe pastaj e bllokoi atë në tokë deri sa gjyqtari i ndeshjes e shpalli fituese të finales.




Majlinda nuk i besonte veshëve të saj kur e dëgjoi dongun e përfundimit të duelit dhe pastaj kur e kuptoi se çfarë kishte arritur, filloi të kërcente dhe të festonte si e çmendur, e më pastaj shkoi për ta përqafuar trajnerin e saj, Driton Kukën.

Kjo është një fitore jashtëzakonisht e madhe për shqiptarët anë e mbanë botës, pasi që sonte Majlinda nuk ka fituar vetëm për vete por për të gjithë shqiptarët që e kanë ndjekur atë dhe e kanë mbështetur hap pas hapi.

Brazili lëshoi himnin tonë kombëtar për Majlindën




Xhudistja kosovare, Majlinda Kelmendi, pasi e mposhti brazilianen Erika Miranda në finale të Kampionatit Botëror, ajo u stolis me medaljen e artë përderisa në sfond u lëshua himni jonë kombëtar.
Majlinda jo vetëm që arriti të triumfonte në Kampionatin Botëror duke fituar medalje të artë, ajo arriti ta bëjë atë që asnjë sportist tjetër nuk e arriti kurrë, të kurorëzohet me muzikën e himnit tonë kombëtar!

Majlinda në këtë garë pati të vendosur edhe logon e Republikës së Kosovës në kimonet e saj, përderisa kur u ngrit në podium për të pranuar medaljen, asaj iu mbushën sytë lotë kur e dëgjoi himnin e vendit të saj.

Majlinda arriti të dëshmojë diçka që shumë politikanë tanë e kanë neglizhuar që një kohë të gjatë, ajo e dëshmoi se ndonjëherë sporti është rruga më e mirë për të lobuar për vendin tonë, sepse sonte e gjithë bota ishte duke e vështruar atë, teksa po jepte imazhin më të mirë të mundshëm për vendin tonë. /Telegrafi/