Ahmeti: FeR nuk do t'i pranoj zgjedhjet e 12 dhjetorit

Njëri nga themeluesit e partisë Fryma e Re (FeR) Shpend Ahmeti, ka deklaruar të enjten se FeR nuk do t’i pranojë zgjedhjet e 12 dhjetorit, pasi që ato janë jolegjitime dhe kanë ndodhur nëpërmjet një procesi totalisht të manipuluar.
Ai tha se partia e tij është dëmtuar shumë nga vjedhja e votave që është bërë në të gjitha komunat e Kosovës, dhe për këtë arsye, në bazë të këtij rezultati FeR nuk ka arritur ta kalojë pragun zgjedhor.

Sipas tij, do të ishte krim që rasti i vjedhjes së votave të izolohet vetëm në Drenas e Skenderaj, kur ai thotë se një situatë e ngjashme ka ndodhur në të gjitha qendrat tjera të Kosovës.

Ahmeti theksoi se çdo subjekt politik që tenton të krijojë qeverinë e re duke bërë koalicion, automatikisht bëhet pjesë e krimit.