Xhelal Farruku: Burrelin s’e ndal asgjë në shtëpi

trajneri i Burrelit, Xhelal Farruku, nuk i lë asnjë shans Bilisht
Sportit për ndeshjen e kësaj fundjave në “Liri Ballabani”, duke u
shprehur i sigurt për një fitore të sigurt të matjanëve. “Asgjë nuk e
ndal Burrelin të fitojë me Bilisht Sportin.
Futbollistët po mësohen me terrenin me borë, gjendje në të cilën do
të luhet edhe ndeshja, ndaj dhe nuk do ta kenë problem për të shfaqur
vlerat më të mira,” - thotë numri 2 i stolit matjan, Farruku. Ndërkaq,
për stërvitje nuk është përdorur fusha e stadiumit, por një ambient pas
burgut, në mënyrë që të mos prishet tapeti i “Liri Ballabanit”.
Zv/trajneri Farruku shton më tej se ekipi është i përgatitur për të
marrë 3 pikët e para të fazës së dytë: “Pretendojmë të kemi një Burrel
më të suksesshëm në vazhdim të kampionatit dhe për këtë është e
domsodoshme ta fitojmë ndeshjen e parë që, për fat, e kemi në fushën
tonë.
Presim një ekip, që duhet konsideruar i vështirë, por, bashkë me
kolegët, i kemi marrë të gjitha masat që futbollistët të mobilizohen
totalisht dhe të marrim maksimumin këtë fundjavë. Pozitiv për Burrelin
është rikthimi i malazezit Rada. Kjo fundjavë do të jetë ndryshe në
“Liri Ballabani”, ku tifozët matjanë do të shohin se si fiton ekipi i
zemrës,” - tha për “Sportin shqiptar” zv/trajneri Xhelal Farruku. Dritan
Kurti