Cana: Krenar që jam te Gallatasaraj, pse të mos qëndroj

Për momentin, në planet e mia nuk ka ndonjë ndryshim destinacioni. Ndoshta mund të largohem vetëm në të ardhmen



E ardhmja e Lorik Canës mbetet e paqartë. Ai ka mohuar kalimin te Lacio, ndërsa ka thënë se dëshiron të mbetet pjesë e Gallatasarajit. E ardhmja e mesfushorit kosovar pritet të mësohet vetëm pas takimeve që ai do të ketë me trajnerin Fatih Terim dhe drejtuesit e rinj të klubit turk.



Flet Cana - Në fakt, ditët e fundit, mediat italiane dhe ato turke kanë raportuar se transferimi i Lorik Canës nga Gallatasaraji te Lacio është punë e kryer dhe se mungon vetëm zyrtarizimi i kësaj lëvizjeje. Por vetë mesfushori i kombëtares shqiptare, i cili po qëndron në vendlindjen e tij për pushime, në një intervistë dhënë agjencisë së lajmeve turke “DHA”, ka mohuar kalimin te klubi roman, drejtor teknik i të cilit është shqiptari Igli Tare. “Për momentin po flitet shumë për transferimin tim, por nuk ka asgjë konkrete rreth kësaj pune. Ende jam futbollist i Gallatasarajit, me të cilin kam kontratë edhe tri vite. Për mua është privilegj dhe krenari të jem futbollist i Gallatasarajit”, - ka thënë Cana.



Ish-futbollisti i Marsejës dhe Sunderlandit ka treguar se, pasi të kthehet në Turqi, do të bisedojë me trajnerin Fatih Terim dhe me drejtuesit e rinj të klubit turk rreth të ardhmes së tij. “Për momentin, në planet e mia nuk ka ndonjë ndryshim destinacioni. Ndoshta mund të largohem vetëm në të ardhmen. Për momentin nuk ka asgjë të sigurt, por kjo nuk do të thotë që do të largohem nga Gallatasaraji. Dua të mbetem aty, por me rëndësi janë planet dhe ambiciet e klubit”, - ka theksuar Cana.



Mediat turke dhe ato italiane prej disa kohësh po raportojnë rreth transferimit të Canës nga gjiganti turk te klubi roman. Ditë më parë thuhej se 27-vjeçari do të luajë pesë vitet e ardhshme te Lacio, ndërsa do të përfitojë nga 1.7 milionë euro për çdo sezon, që i bie rreth 800 mijë euro më pak sesa merrte në Stamboll, te Gallatasaraji, i cili mbylli sezonin më të keq në histori. Mirëpo, sipas mediave italiane, mbetet e paqartë nëse do ta transferojë Lacio kosovarin në formë huazimi dhe më pas t’i paguajë Gallatasarajit dëmshpërblimin prej rreth 4 milionë eurosh, apo në vend të parave do t’i ofrojë gjigantit turk portierin Fernando Muslera.



Flet menaxheri

E ardhmja e Lorikut vendoset javën tjetër

Babai i mesfushorit kosovar, Agim Cana, i cili është njëherësh edhe menaxher i 27-vjeçarit, ka theksuar se e ardhmja e lojtarit të kombëtares së Shqipërisë pritet të mësohet shpejt, përkatësisht gjatë javës që po vjen. “Loriku aktualisht është futbollist i Gallatasarajit, klub me të cilin ka kontratë. Ende nuk ka asgjë zyrtare për një transferim të tij. Gjithçka rreth të ardhmes së Lorikut do të mësohet në javën e ardhshme”, - ka thënë Agim Cana.



4

Klube ka përfaqësuar deri më tani Lorik Cana, si lojtar profesionist: 69 ndeshje dhe 2 gola i ka me Paris SG (2002–2005), 122 ndeshje dhe 8 gola me Olimpik të Marsejës (2005–2009), 31 ndeshje pa asnjë gol me Sunderlandin (2009–2010), 21 ndeshje dhe 1 gol me Gallatasarajin (2010–2011)



50

Ndeshje ka luajtur Lorik Cana me kombëtaren kuqezi, në harkun kohor të viteve 2003-2011. Me fanellën kuqezi, Cana ka shënuar 1 gol, në miqësoren kundër Azerbajxhanit, të fituar 2-1, më 17 gusht 2005. Ai është aktivizuar për herë të parë me Shqipërinë më 11 qershor 2003, në ndeshjen e humbur 3-2, kundër Zvicrës, për eliminatoret “Euro 2004”.