Trofeu i Milanit

Milan është fitues i edicionit të dytë të trofeut Taçi Oil. Rossonerët mposhtën Kombëtaren shqiptare me rezultat të përgjithshëm 8:7. Pavarësisht se pati përballë një ekip me kryesisht futbollistë të rinj shqiptarë, gjiganti italian triumfoi vetëm pas penalltive, meqë ndeshja në kohën e rregullt përfundoi baras 3:3. Ardhja e yjeve të Milanit përsëri ka zgjuar entuziazëm të madh në Shqipëri.

Qindra tifozë shqiptarë kishin dalë të martën në aeroportin ndërkombëtar ‘Nëna Terezë’ për ta pritur ekipin e tyre të zemrës, shtatë herë kampionin e Evropës – Milan.

Ishte kjo hera e dytë që Rossonerët brenda një viti shkelën tokën shqiptare. Mirëpo, kësaj radhe vizita e Milanit ishte shumë më e veçantë, pasi në radhët e tyre ishin edhe yjet si Kaka, Beckham e Pato.

Tifozët e pranishëm në stadiumin Qemal Stafa ishin dëshmitarë të një ndeshjeje atraktive, ku në kohën e rregullt u shënuan gjashtë gola në barazimin 3-3. Pavarësisht një fillimi të mbarë nga ekipi i drejtuar nga Artan Bushati, Rossonerët kaluan në epërsi në minutën e 22-të me golin e yllit brazilian Ronaldinho. Kështu përfundoi pjesa e parë e ndeshjes, ndërsa pak para fillimit të 45 minutave të dyta, Andriy Shevchenko dyfishoi epërsinë për Milanin.

Por, kur të gjithë pritën fitore të lehtë për gjigantin italian, Shqipëria ngriti lojën duke bërë rikthim sensacional. Emilian Vila (minuta 64), Gjergji Muzaka (71) dhe Hamdi Salihi (76) kthyen kuqezinjtë në epërsi për gëzimin e madh të tifozëve vendas.

Mirëpo, sulmuesi veteran i Milanit, Pippo Inzaghi, i inkuadruar në lojë në pjesën e dytë, barazoi rezultatin në 3:3 në minutën e 82-të. Fituesi i edicionit të dytë të turneut Taçi Oil u desh të përcaktohet pas penalltive dhe Rossonerët ishin më të saktë duke fituar 5-4.

Golat për Milanin i realizuan: Kaka, Seedorf, Flamini, Silva dhe Inzaghi. Ndërsa, për Shqipërinë të saktë u treguan Pisha, Muzaka, Vila, Vrapi, ndërsa gaboi Beqiri. Presidenti i Shqipërisë, Bamir Topi ndau trofeun e edicionit të dytë të turneut Taçi Oil për gjigantin milanez.

Megjithatë, rezultati ishte në plan të dytë. Mijëra tifozë nga Kosova, Maqedonia e Mali i Zi kishin pushtuar kryeqytetin e Shqipërisë për t’i parë nga afër yjet e futbollit botëror si Kaka, Beckham, Ronaldinho, Pirlo, Maldini, Nesta, Seedorf, Shevchenko etj.

Disa nga ata që kishin dalë për ta pritur dhe shikuar ndeshjen e ekipit të tyre të zemrës ishte hera e parë që shihnin me sytë e tyre idhujt që deri dje kishin rastin t’i shihnin vetëm nëpërmjet ekranit.

Madje kishte nga ata tifozë të cilët nga aeroporti ‘Nëna Terezë’ me vetura kanë përcjellë eskortën e Milanit deri te hoteli Sheraton.

Pas akomodimit në hotel Sheraton, nënkryetari i Milanit, Adriano Galliani, trajneri Carlo Ancelotti dhe dy ambasadorët e UNICEF-it, Kaka e Beckham, mbajtën një konferencë për media.

Galliani ka falënderuar shqiptarët për pritjen madhështore që u është bërë, derisa ka thënë se Milan gjendet përsëri në Shqipëri fal pronarit të kompanisë ‘Taçi Oil’, Rezart Taçi.

I pyetur nga Gazeta Express se kur mund të realizohet ‘Milan Camp Junior’ në Kosovë, pasi njihet si vend i talenteve, Galliani është përgjigjur: “Për këtë duhet ta pyetni zotëri Rezart Taçin”.

Ndërsa ylli brazilian Ricardo Kaka për herë të parë ka shkelur tokën shqiptare, derisa është impresionuar nga pritja që i është bërë në Shqipëri.

“Nuk isha herën e parë me skuadrën. Kjo është hera e parë që vij në Shqipëri. Jam i lumtur sepse është një vend i ri, ka njerëz të rinj, kulturë të re. Në Itali njoh dy tre shqiptarë, ata janë njerëz mjaft simpatikë dhe jam i lumtur që ndodhem këtu, që kam ardhur në vendin tuaj”, ka thënë Kaka.

Nga organizatorët e ndeshjes është bërë e ditur se të ardhurat nga ndeshja Shqipëri –Milan do të dedikohen për organizatën ‘Fëmijët Shqiptarë’.

Edicionin e parë të trofeut ‘Taci Oil’ e kishte fituar skuadra e Tiranës, e cili në stadiumin ‘Qemal Stafa’ pati mposhtur Rossonerët me rezultat 2:1.