Horrori i parë

Në Kosovë ka filluar për herë të parë të xhirohet një film i zhanrit horror. Djaloshi 19 vjeçar, Albert Feka ka vendosur që të bëj çdo gjë të mundur që të krijojë filmin “Akti final” që i takon këtij zhanri. Ai ka filluar xhirimet ndërkaq është në kërkim të ndonjë donatori eventual për ta përfunduar atë.

I inspiruar nga filmat e njohur horror si “Silent Hill”, “Resident Evil”, “Scary Movie” dhe filma të tjerë, të rinjtë Albert Feka dhe Burim Goxhuli nga Mitrovica, edhe pse me përvojë jo shumë të madhe kinematografike, kanë filluar xhirimet e filmit, “Akti final”.

Skenarin e filmit janë duke e shkruar të dy të rinjtë mitrovicas, të cilët, megjithatë, thonë se kanë pasur përvojë në disa projekte me filmat bashkëkohorë, edhe pse nuk i tregojnë ata. “Akti Final është një film që trajton tema nga jeta moderne, ku adoleshenca shquhet si mosha më kritike prej të gjitha moshave tjera. Në këtë film bëhet fjalë për konceptin e jetës, se çfarë vlere ka jeta dhe si adoleshentet mundohen ta gjejnë kuptimin e saj”, ka thënë Goxhuli për Express.

Sipas tij, protagonistëve kryesorë u jepet rasti që të depërtojnë në botën e tmerrshme që në disa raste është krejtësisht e panjohur.

“Hallka që e shtyn të depërtojë në atë botë është kureshtja e tij se çfarë mund të ndodhë pas vdekjes, kështu që vjen deri tek vetëvrasja. Mos- vlerësimi i jetës në mënyrë të duhur i ndërton atij sfida të rënda nga të cilat mëson shumë”, thotë Guxhuli.

Filmi ka xhiruar skenat e para nëpër qytetin e Mitrovicës.

Skenaristët e këtij filmi thonë se ata do të jenë edhe vet aktorë në film, pra do të bartin vetë rolet kryesore, kurse në rolet e tjera do të paraqiten edhe Albulena Alushaj, por Burimi thotë se ende nuk janë definuar rolet kryesore.

Burimi thotë se ka kontakte edhe me producentë në Prishtinë, nga të cilët shpreson që ta ndihmojnë për projektin e tij.

“Personazhit kryesor i jepet një mundësi e dytë për të kuptuar jetën dhe për t’u kthyer në të. Sfidat që ai i përjeton e bëjnë atë që të luftojë me çdo armë për t’u rikthyer në jetë, madje edhe t’ua merr jetën të tjerëve, dhe ky është gabimi fatal që pëson gjatë gjithë
eksperiencës. Sepse jeta ka të njëjtën vlerë për të gjithë, jeta nuk jetohet në vetmi”, thotë ai.

Autorët e këtij filmi thonë se nuk kanë ndonjë datë të caktuar se kur mund të përfundojë filmi dhe të jepet nëpër kinema, edhe pse ata mendojnë që ata ta realizojnë në formatin televiziv.

Kjo është hera e parë që në Kosovë xhirohen filma të zhanrit të tillë, pra të zhanrit horror, edhe pse më parë në Kosovë janë krijuar filma në teknikë digjitale nga Halil Budakova, i cili gjithmonë mundohet të shkojë drejt kopjimit të zhanrit të filmave të Bollywood-it.

Por, skenaristët nga Mitrovica duket se kanë filluar kontaktet me producentë nga Prishtina, si Nehat Fejza nga Concordia Pictures, por ende nuk dihet se a ka pranuar Nehati që t’ju ndihmojë të rinjve nga Mitrovica.