Kosovë, 10 vjet nga mbarimi i luftës

Dhjetë vjet më parë, më 12 qershor 1999, trupat paqeruajtëse të NATO-s hynë në Kosovë duke i dhënë fund luftës gati dyvjeçare dhe fushatës 78-ditëshe të bombardimeve të Aleancës kundër forcave serbe.

Me rastin e dhjetë vjetorit të përfundimit të luftës, udhëheqësit politikë të Kosovës u drejtuan falënderime trupave të NATO-s.

Presidenti i Kosovës Fatmir Sejdiu tha se 12 qershori i vitit 1999 është njëra prej datave më të rëndësishme në historinë e Kosovës.

Kryeministri Hashim Thaçi tha se me ndërhyrjen e NATO-s, filloi liria e Kosovës, e cila sot bashkë me dhjetëvjetorin e kësaj ndërhyrjeje kremton edhe njëvjetorin e hyrjes në fuqi të Kushtetutës së saj.

Por kjo ditë nuk ka kuptim të njëjtë për komunitetin serb, përfaqësuesit e të cilit thonë se problemet në Kosovë janë ende të hapura.

Rangjel Nojkiç i Lëvizjes Serbe të Rezistencës, thotë se parakusht për normalizimin e jetës është vlerësimi i shkaqeve dhe pasojave të konfliktit. Sipas tij është fakt se ish presidenti serb Sllobodan Millosheviç zbatoi një politikë të padrejtë dhe të dëmshme në hapësirat e ish Jugosllavisë, por as bashkësia ndërkombëtare nuk ka sjellë paqen.

Ai thotë se paqja e qendrueshme në Kosovë do të arrihet kur të zgjidhen problemet ndërmjet shqiptarëve dhe serbëve.

Rreth 50 mijë trupa të NATO-s u vendosën në Kosovë dhjetë vjet më parë ndërsa numri i tyre është shkurtuar vit pas viti. Aktualisht këtu ndodhen 14 mijë trupa dhe deri në fund të vitit ky numër pritet të ulet në rreth 10 mijë. Kjo, sipas autoriteteve të NATO-s, është pasqyrim i përmirësimit të gjendjes në terren.

Megjithatë, edhe autoritetet ndërkombëtare edhe ato vendase janë të një mendimi se vendi ka ende nevojë për praninë ushtarake ndërkombëtare, derisa të jenë ngritur dhe fuqizuar mekanizmat e brendshëm të sigurisë.

Nëntë vjet pas përfundimit të luftës Kosova shpalli pavarësinë e saj të cilën e kanë njohur deri tani 60 vende të botës, përfshirë Shtetet e Bashkuara dhe vendet kryesore të Bashkimit Evropian.


FT: Shkurtimi i trupave të NATO-s, stabilitet në Kosovë

Vendimi i ministrave të Mbrojtjes të vendeve anëtare të NATO-s për zvogëlimin e numrit të ushtarëve në Kosovë përbën konfirmimin për stabilitetin gjithnjë e më të madh të shtetit të ri të Ballkanit, shkruan gazeta e njohur londineze "Financial Times".

Gazeta thekson se ministrat me vendimin e tyre kanë bërë hapin e parë që do të sjellë zvogëlimin e konsiderueshëm të trupave të Aleancës në Kosovë.

Pritet që zvogëlimi i parë nga 14 000 uushtarët aktualë të fillojë vitin e ardhshëm, ndërkohë që pas dy viteve përbërja e NATO-s në Kosovë do të numërojë vetëm 2 500 persona.

Sipas gazetës londineze, ushtarët tani janë më të nevojshëm në Afganistan sesa në Kosovë, ndërkohë që shtetet anëtare do të vendosin vetë se kur do të tërheqin trupat e tyre nga shteti më i ri në botë.

"Paraprakisht këtë vit këtë veprim tentoi ta bëjë Spanja, që madje edhe caktoi datë për tërheqjen, por hoqi dorë nga një masë e këtillë e njëanshme nën presionin e vendeve të tjera anëtare në Aleancë", vëren "Financial Times"