Arta Lala: Ndihem mirë kur këndoj në shqip!

Edhe pse jeton në Hamburg të Gjermanisë, malli për Kosovën e ka shtyrë që profesionin e këngës ta ushtrojë edhe këtu. Kjo edhe pasi që të kënduarit në gjuhën shqipe e bën të ndihet mirë. Arta Lala që nga mosha 3-vjeçare ka nisur shkollimin për këngën dhe gradualisht karrierën e saj të këngës pretendon ta ushtrojë edhe në Kosovë. Për më shumë rreth këngës dhe jetës private flet për “Zëri-n”.

- Çfarë ju shtyri të hyni në botën e këngës?

- Jam e lindur në një familje muzikantësh. Qysh e vogël e kam dashur muzikën dhe që nga mosha 3-vjeçare kam nisur të marr mësim për këndim. Thjesht është një profesion që më pëlqen dhe që s’mund të rri pa të. Është pjesë e jetës sime me të cilën jam rritur.

- Edhe pse këngën e keni nisur herët, në skenën muzikore të Kosovës nuk ju kemi parë, cilat kanë qenë arsyet?

- Në Kosovë nuk kam qenë shumë aktive. Në realitet unë kam pasur një pauzë nga kënga dhe kështu që për disa vite nuk jam marrë me të. Mirëpo, shkollimin për këngë nuk e kam ndërprerë dhe tani meqë kam filluar angazhimet ato po më ndihmojnë shumë. Ndërsa sa i përket Kosovës, nuk kam qenë fytyrë e njohur për shkak se tani kam filluar të realizoj këngë këtu. Pra, karrierën muzikore në Kosovë e kam nisur tani.

- Jeni e kënaqur me fillimin, keni vështirësi për të depërtuar?

- Natyrisht se fillimi është i vështirë, por fatmirësisht kam njerëz që më ndihmojnë këtu në Kosovë, dhe po arrij edhe të depërtoj. Uroj që fillimi i karrierës sime të niset me suksese dhe më pas të depërtoj shpejt tek adhuruesit e mi. Kam përshtypjen se dëshira e madhe ndaj këngës ka bërë që edhe Zoti të m’i hapë të gjitha rrugët si në Kosovë ashtu edhe këtu në Hamburg të Gjermanisë, ku jetoj.

- Çfarë zhanri muzikor kultivoni?

- Kultivoj zhanrin e këngës dance dhe RnB. Këto janë dy stile të këngës që më pëlqejnë më së shumti, por nuk do të thotë që s’kam kënduar edhe në zhanre tjera.

- Ke ndonjë obligim tjetër jashtë këngës?

- Çdo gjë më lidh me këngën, jam duke vijuar mësimet në shkollë të muzikës për këndim.

- Cili është hobi juaj?

- Hobi im është vallëzimi dhe sporti, kohën e lirë merrem me to.

Unë shkoj pra edhe në shkollë të muzikës për këndim dhe jam në përgatitje të këngës së dytë, e cila do të dalë së shpejti.

- Jeni e dashuruar?

- Tani nuk dua të flas për jetën time private, me kalimin e kohës ndoshta do të më ndërrohet mendja dhe ju tregoj.

- Ndonjë plan për të ardhmen?

- Për tani mund të them se jam në përgatitje të një kënge të re dhe besoj se shumë shpejt do ta lansoj. Uroj që këngët e mia të pëlqehen në Kosovë dhe këtu ta kem publikun tim.