BE: Shqipëria zhvillime pozitive!

Komisioni Evropian (KE) vlerëson pozitivisht reformat e integrimit në Shqipëri si dhe zhvillimet më të fundit në vend. Pjesa më e rëndësishme mbetet ende reforma zgjedhore, dhe progreset e arritura javët e fundit. Parlamenti Evropian (BE) ka shprehur vullnetin e mirë për të përfshirë në rezolutën për Shqipërinë të gjitha arritjet që Shqipëria mund të korrë deri në tetor.

Përveç qasjes më aktive dhe inkurajimit të Komisionit Evropian (KE) për reformat e integrimit në Shqipëri, një ndjeshmëri pozitive ndaj zhvillimeve të fundit në vend është shprehur hapur edhe në takimet që ministrja e integrimit Majlinda Bregu ka zhvilluar me deputetë të Parlamentit Evropian (PE).

Zëvendëskryetari i delegacionit për Ballkanin, Libor Roucek i grupimit socialistdemokrat ve në pah progreset që janë arritur javët e fundit, duke u ndalur veçanërisht tek rëndësia e reformës zgjedhore.

“Zhvillimet janë pozitive dhe mund të themi se janë bërë shumë progrese. Por ne jemi ndalur gjerësisht tek reforma zgjedhore. Jo lidhr me detajet e zgjedhjeve, pasi kjo nuk është detyra jonë. Por ajo që është e rëndësishme për ne dhe që u themi forcave politike në Shqipëri është që kodi zgjedhor dhe proçedurat të jenë në përputhje me rekomandimet e OSBE/ODHIR. Pasi na pëlqen apo jo, Shqipëria nuk do të gjykohet për faktin se kush do fitojë apo kush do ti humbi zgjedhjet e 2013, por se sa do ti plotësojë vendi standartet gjatë zgjedjeve në 2013”, u shpreh Roucek.

Eurodeputetja Doris Pack, apo kryetari i delegacionit për Ballkanin , Eduard Kukan i grupimit të djathtë në Parlamenti Evropian (PE) ndajnë qëndrimin e komisionerit Fyle, se Shqipëria duhet të ecë përpara me të gjitha aksionet e nevojshme, në mënyrë që të ofrojë një masë të konsiderueshme rezultatesh konkrete, duke përfshirë edhe përfundimin e shpejtë të reformës elektorale dhe rishikimin e rregullores së Parlamentit Shqiptar. Edhe në takimin që ministrja Bregu ka patur me raportuesin për Shqipërinë, Nikolaos Chountis, është vënë në pah vullneti i Parlamentit Evropian (PE) për të përfshirë në rezolutën për Shqipërinë të gjitha arritjet që Shqipëria mund të korrë deri në tetor.