Largimi i mbipeshës me aktivitete fizike!

Mbipesha sot është njëri ndër problemet më të mëdha shëndetësore. Mënyra moderne e ushqimit, që nënkupton ngrënien e shpejtë dhe pak lëvizje, është fajtori kryesor për gjithnjë e më shumë njerëz me mbipeshë në botë.

Shumë mendojnë që nga kilogramët e tepërt mund të shpëtojnë kryesisht me dieta, por ekspertët paralajmërojnë se ushtrimet janë më të rëndësishmet kur kemi të bëjmë me dobësimin e shëndoshë. Para se të futeni në programin e rregullt të aktiviteteve fizike, duhet që të bëni një kontrollim të detajuar si dhe të këshilloheni me mjekun.

Tek personat me kilogramë të tepërt apo me probleme të caktuara shëndetësore lloje të ndryshme të sporteve mund të jenë kontraproduktive. Fillestarëve iu rekomandohet stërvitja në intervale: në fillim, ngarkesa duhet të jetë e matur, me faza të shkurta gjatë të cilave trupi do t’i ekspozohet një lodhjeje më të madhe, dhe atë deri në kufijtë e mundësive të tij. Pas disa javëve efekti automatikisht do të rritet, dhe pas kësaj nuk do të keni nevojë për përpjekje të madhe fizike.

- Vrapimi: Fillestarët do të duhet të ushtrojnë në intervalet: pesë minuta ecje të shpejtë, 30 sekonda sprint, dhe pastaj përsëri ecje të shpejtë. Gradualisht duhet që të zgjaten fazat e shpejta dhe të rritet shpejtësia në intervalet e ngadalshme.

- Këshilla: trajnimi do të jetë efektplotë nëse vraponi nëpër terrene të ndryshme dhe të ashpra. Ky lloj i trajnimit nuk është i përshtatshëm për personat me sistemin e sëmurë motorik, si dhe për ata me shumë kilogramë, pasi që me rastin e goditjes së shputës në tokë, nyjat dhe shtylla kurrizore janë shumë të ngarkuara. Këta trajnimin duhet ta fillojnë me shëtitjen e shpejtë dhe ecjen nordike. Me vrapim harxhohen 500 kalori, sa përmban një makiato (0.25 l).

- Noti: Kush vetëm zhytet në ujë, sigurisht që nuk do të dobësohet. Që ta arrijë këtë, duhet që të mundohet më shumë, dhe kjo është të notojë me temp të shpejtë disa gjatësi, sipas mundësisë, në stile të ndryshme duke i kombinuar. Avantazhi i këtij sporti është se është shumë i përshtatshëm për personat me kilogramë të tepërt dhe të cilët kanë kondicion shumë të keq.

- Këshilla: gjimnastika në ujë, akuajogging dhe akuabik e rrisin efektin. Notimi sportiv harxhon 550 kalori, sa i ka 100 gramë e kikirikëve të pjekur.

- Vozitja e biçikletës: Biçikleta mund të vozitet gjithmonë: në rrugën për punë, kur shkoni në shitoren, në kohë të lirë apo kur jeni në pushim. Ky sport fare lehtë mund të futet dhe përshtatet në agjendën ditore. Përveç kësaj, ndikon në krijimin e baraspeshës psiko-fizike. Duhet që ta keni gjithmonë të vendosur kapelën, që në rast rreziku lëndimin e kokës ta zvogëloni në minimum.

- Këshilla: ulësja duhet të jetë e rehatshme dhe e vendosur në atë mënyrë që me rastin e rrotullimit të pedaleve do të mundeni në tërësi të shtrini këmbën. Duke vozitur biçikletë do të digjni 450 kalori, që i përgjigjet gjysmë pice.

- Lojërat me top: S’ka lidhje a bëhet fjalë për hendboll, volejboll apo futboll-fakti është se lojërat me top djegin shumë kalori, ushtrojnë muskujt dhe përmirësojnë koordinimin e lëvizjeve. Avantazhi i këtyre sporteve është në atë se nëpërmjet lojës në tërësi harrojmë në ngarkesën fizike. Për këto sporte ju janë të nevojshme atlete të mira që mos t’i lëndoni nyjat.

- Këshilla: më argëtuese është kur të luani në grup. Bashkëlojtarët do t’i gjeni pa problem në terrenet sportive apo nëse anëtarësoheni në ndonjë klub. Lojërat me top harxhojnë 600 kalori, sa përmban një pjesë e tortës me shlag. /zeri/