Sandërlendi, një ide për Lorik Canën

Lorik Cana mund të rikthehet në Angli te Sandërlendi. Lajmin e bëjnë të
ditur mediat britanike. Sipas këtyre të fundit, kapiteni i Kombëtares
shqiptare është duke kërkuar një skuadër të re, pasi nuk do të qëndrojë
më te Lacio. “Lorik Cana është duke kërkuar një rikthim në Premier Ligë.
Me shumë mundësi, nëse kjo ndodh, atëherë ai pritet t’i bashkohet
Sundërlendit, ku luajti në sezonin 2009-2010″, – shkruanin dje mediat
angleze. Në fakt, prej muajsh flitet për një largim të Canës nga
bardhekaltërit. Madje, edhe vetë 29-vjeçari, gjatë një interviste për
mediat italiane, ka pranuar në fundvitin e kaluar se mund të largohet në
verën e 2013-s nga Lacio. Cana nuk është një titullar fiks te skuadra
italiane dhe kjo ka bërë që ai të mendojë “divorcin”. Nga 18 javë që
janë zhvilluar deri më tani në Serinë A, Cana ka luajtur në vetëm 9
takime, kryesisht si zëvendësues. Vetëm në ndeshjet e Ligës së Europës
dhe të Kupës së Italisë, kosovari është preferuar si titullar. Kujtojmë
që Cana iu bashkua ekipit bardhekaltër në sezonin 2011-2012.