Vitamina C, mikesha jone më e mirë në Pranverë!

Natyra

Pranvera po vjen dhe luhatjet e forta tipike të temperaturës gjatë kësaj periudhe shkaktojnë shumë raste ftohjeje. Të gjithë e dinë se kur hundët fillojnë të rrjedhin dhe muskujt janë ngrirë, organizmit i mungon vitamina C e cila gjendet me bollëk te lëngu i portokallit.

Fatkeqësisht, në momentin kur virusi është shfaqur, vitamina C nuk mund të veprojë shumë, por duke e siguruar atë çdo ditë, ftohjet mund të parandalohen dhe nëse jeni sëmurë, kjo do të kalojë për një kohë më të shkurtër. Kjo është konfirmuar nga rishikimi i studimeve të mëparshme të kryera nga shkencëtarë mbi kushte të ndryshme.

Shqyrtimi

Studiuesit kanë analizuar të dhënat e pesë kërkimeve që kanë përfshirë persona nën stres të lartë fizik: vrapues, ushtarë kanadezë gjatë stërvitjeve në dimër dhe fëmijë të cilët merrnin pjesë në një shkollë-kampi për ski. Në të gjitha këto raste, disi ekstreme, rreziku i infeksioneve është i lartë, por konsumimi i rregullt i vitaminës C dhe ushqimeve që kanë këtë vitaminë, ka reduktuar rastet e ftohjes. Një studim tjetër, i kryer kësaj here te disa notarë adoleshentë të përfshirë në gara të ndryshme, konfirmoi më pas që kjo dozë me vitaminën C, jo vetëm që ul probabilitetin për t’u sëmurë, por edhe shkurton shumë kohëzgjatjen e zakonshme të një ftohjeje. Të rriturit që i qëndrojnë dozës së domosdoshme të vitaminës C mbesin të sëmurë mesatarisht 8 për qind më pak, ndërsa fëmijët mund të qëndrojnë në krevat deri në 18 për qind më pak.

“Gjithsesi bëni kujdes, po flasim për vitaminën C e cila merret rregullisht dhe jo për atë të cilën e marrim me ‘vrap’ në momentin kur shfaqet një sëmundje”, thotë Fabrizio Pregliasco, virolog nga Universiteti i Milanos.

Në fakt, ashtu siç e shpjegojnë edhe studiuesit, vlerësimi i saktë i efektit të vitaminës C në luftën kundër sëmundjeve virale nuk është i lehtë. Në rast se të dhënat mblidhen para simptomave të para, efekti i vitaminës magjike është edhe më i vështirë për t’u matur. Për më tepër, viruset qarkullojnë me shumicë në trupin tonë dhe në disa raste, as nuk dallohen fare nga ne.

Dieta

Megjithëkëtë, “duke pasur parasysh efektet e mira të parandalimit dhe mbi të gjitha, koston shumë të ulët dhe rreziqet e pakta të marrjes së zakonshme të vitaminës C, kush vuan shpesh nga ftohjet mund të provojë të sigurojë çdo ditë një gram”, shkruajnë studiuesit. Zakonisht 100 gramë portokall ka 53 miligramë vitaminë C dhe mjafton një kokërr portokall me rreth 200 gramë për të plotësuar nevojat ditore.

Nga ana tjetër, kjo do të ishte jo e dobishme tek ata të cilët kanë një numër ftohjesh “normale”. Të rriturit kanë shumë pak ftohje “normale” gjatë vitit, ndërsa fëmijët sëmuren deri në gjashtë herë në vit.

Për të rriturit, nevoja për vitaminë C mund të mos duket shumë e madhe për shkak se ftohja serioze ndodh relativisht rrallë, por edhe në këto raste, mjekët mendojnë se ia vlen përkujdesi për konsumim të rregullt. Për fëmijët, kjo gjë bëhet e domosdoshme. Aq e domosdoshme, sa në kohën e Luftës së Dytë Botërore, p.sh., në Britaninë e Madhe, u racionuan të gjitha llojet e ushqimeve, por qumështi dhe lëngu i portokallit, nuk u racionuan, sepse konsideroheshin shumë të rëndësishme për shëndetin e fëmijëve.

Por studiuesit mendojnë gjithashtu se konsumimi i vitaminës C nëpërmjet tabletave që shiten në farmaci nuk është mënyra më e mirë.

“Idealja është që furnizimi i trupit me vitaminë C të bëhet nëpërmjet dietës”, rekomandon Pregliasco. Me një dietë të ndryshme dhe të balancuar, ju mund të merrni një sasi të mirë të vitaminës C, që reagon si një antioksidant dhe në sajë të kësaj, ajo ju mbron nga infeksionet virale si ftohja.