Te Barcelona shikojnë Ronaldon favorit për “Topin e Artë”

Te Barcelona të gjithë po mësohen pak nga pak me faktin se mund të mos jetë sërish Lionel Messi ai që do ta fitojë Topin e Artë, por rivali i tij më i madh, Cristiano Ronaldo. Mbrojtësi brazilian, Dani Alves shprehet se këtë herë mund të jetë radha e portugezit për ta çuar në shtëpi trofeun prestigjoz pasi ai po kalon një moment fantastik, prandaj është edhe më favorit se rivalët e tij në këtë garë.

“Cristiano Ronaldo po luan shumë mirë dhe ka shanse të mëdha për të fituar Topin e Artë. Është e vërtetë që nuk ka fituar asnjë trofe me skuadrën e Realit por më duhet ta pranoj se forma e tij është fantastike. Unë dëshiroj që të shikoj njërin prej dyshes Messi-Ribery ta çojë trofeun dhe nëse nuk do të mundesha t’ia jepja argjentinasit do të zgjidhja francezin pasi ai ka fituar gjithçka me Bayernin”.

Por nëse Dani Alves e pranon se nuk do të dëshironte ta shikonte portugezin me trofeun në duar, Pique mban një qëndrim disi më të ndryshëm, duke treguar se armiqësia në fushën e lojës nuk ka vlerë kur flitet për lojtarë të klasit botëror. Mbrojtësi katalanas shprehet se si një shok që në kohën e Manchester United e vlerëson Cristiano Ronaldon si një lojtar profesionist por edhe si një njeri pozitiv edhe jashtë fushës së lojës. Në vijim të deklaratës së tij, Pique nuk del hapur me një preferencë, duke theksuar se Messi dhe Ronaldo janë maksimumi i futbollit. Po në kampin katalanas një tjetër lojtar përpiqet të amortizojë dëmet që mund të shkaktojë Topi i Artë në duart e numrit 7 të Realit. Sipas mesfushorit argjentinas, Javier Mascherano, Lionel Messi nuk ka nevojë për stimuj sepse ai do të mbetet një njeri i lumtur dhe lojtar spektakolar në fushën e lojës edhe nëse nuk e fiton Topin e Artë. Ai shton gjithashtu se nuk duhet të merret parasysh vetëm paraqitja në dy muajt e fundit të vitit pasi ky çmim vlen për vlerat e treguara gjatë gjithë vitit kalendarik. /BS/