Të bukurat e Shqipërisë gati për sfidë!

Kanë shëtitur më shumë se dy javë nëpër të gjithë Shqipërinë, por kanë përfunduar në Ulqin. Mali i Zi është ndalesa e fundit që të bukurat shqiptare kanë ndërmarrë. Pasi, pikërisht në këtë qytet turistik do të zhvillohet konkursi i bukurisë “Miss Shqipëria 2014”. Finalja e madhe do të mbahet në datën 27 qershor, por vajzat së bashku me stafin që do të realizojë këtë edicion të “Miss Shqipëria” kanë mbërritur në Mal të Zi që në mbrëmjen e kaluar për të nisur punën. Pas një turi të gjatë nëpër të gjithë Shqipërinë, ndoshta kjo do të jetë pjesa më e vështirë për stafin, i cili duhet të përgatitet për t’i sjellë diçka të mirë audiencës në Shqipëri. “Shekulli” do t’ju përcjellë sot, fotot e bukurosheve, të cilat janë pretendentet kryesore për kurorën e këtij viti. Gjatë këtij turi dhe në ndalesat e tyre në disa nga vendet më turistike të Shqipërisë kanë qenë të pranishëm edhe pjesë të stafit organizues të këtij konkursi bukurie.

Pjesëmarrësit

Si çdo herë edhe këtë vit garojnë 31 vajza të përzgjedhura ditët e fundit të majit nga organizatorët e eventit. Këtë vit kanë garuar gati 240 vajza, të cilat fillimisht pretendonin të ishin në grupin e 31 më të mirave. Këngëtarja Orinda Huta do të jetë prezantuesja e këtij eventi, por nuk do të mbetet me kaq. Ajo nuk do të mungojë në skenë edhe si këngëtare. Të tjerë këngëtarë që do t’i bashkohen skenës janë artistët e njohur shqiptarë si: Irma Libohova, Elton Deda, Redon Makashi, Aleksandër Gjoka, Mihrije Braha etj.

Juria, dorëzimi i kurorës

Juria e këtij edicioni bukurie do të jetë e përbërë po nga emra të njohur të skenës shqiptare. Virgjil Kule, Kledi Kadiu, Holta Dulaku, Ylljet Aliçka, Amarda Toska, Arlinda Dudaj dhe Florenza Lekstakaj, do të përzgjedhin në Ulqin "Miss Shqipëria 2014". Kjo e fundit, bukuroshja 18-vjeçare që jeton në Firence e shpallur "Miss Shqipëria 2013”, në mbrëmjen e 27 qershorit do t'i dorëzojë kurorën një tjetër mbretëreshe të bukurisë.

Turizëm, Vlorë, Berat, Kavajë, Durrës, Theth, Shkodër...

Rrugëtimi i "Miss Shqipërisë 2014" filloi në qytetin e Vlorës, ku për dy ditë vajzat kanë vizituar bazën e Pashalimanit, duke prerë në një farë mënyrë edhe shiritin e moratoriumit, i cili deri tani ndalonte udhëtimin me mjete të motorizuara përgjatë bregut. Me anije turistike, ndryshe nga vitet e tjera ku vajzat janë shoqëruar nga policia dhe kanë udhëtuar me anije luftarake , ato kanë parë Karaburunin, bregun e pastruar të Vlorës dhe bukuritë natyrore të bregut shqiptar. Më pas, turi ka vazhduar në Berat, ku bukuroshet kanë vizituar kalanë dhe ku janë pritur nga banorët. Mali i Shpiragut ka qenë destinacioni i radhës ku janë realizuar etyde, janë vjelur qershitë, fruti i stinës nëpër frutoret e zonës, kanë parë Osumin dhe më pas i janë drejtuar qendrës së Shqipërisë. Në Kavajë janë zgjuar sërish emocionet e edicionit të dy viteve më parë në vizitën e bërë në Gosë, ku u realizua "Miss Shqipëria 2012". Në Durrës, vajzat kanë qenë protagoniste të një feste të organizuar në një nga klubet e këtij qyteti me veshjet e skuadrave më të njohura të futbollit në botë, me rastin e çeljes së Kampionatit Botëror Brazil 2014. Pas kësaj, grupi i është drejtuar Veriut, për herë të parë qytetit të Pukës, ku janë mirëpritur nga banorët dhe kanë qenë mysafiret speciale të haneve, vizitore të muzeut të qytetit, bukurive natyrore dhe historike që ruan ky qytet me shtrirje të madhe gjeografike. Më tutje, në Malësinë e Bogës, vajzat kanë pasur si destinacion final Thethin, për ta përmbyllur udhëtimin në qytetin e Shkodrës.