E sëmurë nga dashuria!

Libri “Gorgonë” i autores Blerina Rogova-Gaxha, që u promovua në Bibliotekën Kombëtare dhe Universitare, u vlerësua si një libër që trajton në mënyrë të veçantë dashurinë, e pos kësaj edhe vetminë, seksin, tradhtinë, mërzinë, ndarjen etj.

Megjithëse në Kosovë poezia shkruhet në masë të madhe dhe ende vazhdon të jetë gjinia mbizotëruese letrare, cilësia e saj nuk është aq e kënaqshme. Përjashtim mund të bëjë ndonjë libër aty këtu. Një përjashtim i tillë mund të konsiderohet edhe libri “Gorgonë” i autores Blerina Rogova-Gaxha, i cili u promovua në Bibliotekën Kombëtare dhe Universitare.

Duke folur për këtë libër, Sali Bashota, poet dhe kritik letrar, tha se Blerina ka mbërritur bukur t’i sintetizojë idetë dhe mendimet poetike, si dhe ka mbërritur bukur të arrijë deri të rezultati poetik dhe mjeshtëria e krijimit të saj korrespondon me këtë harmonizim.
“Më ka pëlqyer mënyra se si Blerina i thur idetë e saj për t’i kthyer në figurë. Tri elemente kryesore mendoj që i ka libri ‘Gorgonë’. Së pari e ka temën, së dyti e ka gjuhën poetike dhe së treti figurën”, u shpreh Bashota.

Ndërkaq, Rrahman Paqarrizi, gjuhëtar, tha se libri ‘Gorgonë’ është pasqyrë rebele e autores. Ai tha se në këtë libër, herë pas here shpërthen një lirikë rebele e motivuar nga rok poezia apo një rok baladë që në vete të krijon edhe ndjenjën e muzikës, me të cilën do të përcillej eventualisht, e herë të tjera nxjerr kryesisht një poezi më teknike, më të frenuar nga vija teorike mbi letërsinë që autorja me këtë rast e nxjerr me kast.

“Janë këto dy tërësitë që e karakterizojnë gjithë librin dhe që mjeshtërisht përmblidhen që në poezinë e parë, e cila mund të jetë programi apo refreni poetik i tërë librit, që ka edhe një titull jo vetëm indikativ por mjaft sinjifikativ ‘Guns n’ Roses’ që njëkohësisht është emri i rok grupit pothuajse më reprezentativ, që i ka qëndruar besnik frymës së rokut rebel dhe njëkohësisht mjaft të ndjeshëm, që dihet tashmë se ka ardhur nga rebelizmi i gjeneratës Beat, qoftë në poezi qoftë në muzikë”, tha Paqarrizi.

Edhe referuesi i tretë, Flamur Maloku, kritik letrar, e vlerësoi këtë libër, duke theksuar se
poezia e Blerina Rogoves formulohet duke e krijuar një sistem të ligjërimit. “Ligjërimi, në tekst bëhet ligjërim i figurshëm i shtresuar në variante, që njëherësh bëhet shenjë e identifikimit për tekstin-poezinë, gjithnjë duke e përforcuar figurën e tekstit, e cila bëhet shenjë themelore e kuptimësisë”, u shpreh Maloku.

Në fund, Ag Apolloni, poet dhe kritik letrar, theksoi se libri “Gorgonë” është një pasurim kuantitativ dhe kualitativ i poezisë së dashurisë. “Në aspektin tematik, ky libër është monotematik, në aspektin versifikativ është i larmishëm, ndërsa në aspektin strukturor paraqitet si sistem, i cili mund të vërehet edhe nga njësitë ndarëse: Prolog, Feniks, Mares, Letha dhe Epilog. Brenda këtij libri shtrihet tema e dashurisë e përjetuar nga subjekti femër dhe e artikuluar me nota rebeluese. Rebelimi këtu zakonisht ka kuptimin e kundërvënies ndaj kufizimeve që shkakton kurora në botën e femrës. Prandaj, dashurisë i këndohet me frymën e muzikës rok, duke u përqendruar në raportet seksuale mes dy gjinive të shikuara me sy femre”, tha Apolloni.

Sipas tij, titulli Gorgonë ka kuptimin e një shpirti që bëhet i rrezikshëm kur dashuron dhe është në gjendje ta tmerrojë të dashurin, duke mos u ndaluar para kurrfarë pengesash.