“Kujtimet e Natës” shfaqja më e mirë në Skupi Fest!

“Kujtimet e Natës” nga trupi teatror zviceran, është shpallur si shfaqe më e mirë dhe fitues i çmimit Grand Pri në festivalin e tretë me radhë të teatrit “Skupi Fest”.

Fituesi, aktori Philip Boe i cili njëherësh është dhe autori i projektit, tha se marrja e këtij çmimi është me shfaqen “Kujtimet e Natës”, është valorizim i mundit të tij dhe i gjithë ekipit.

“Edhe pse emri im është ai që fitoi çmimin, më duhet të them se ka më shumë persona që punuan në këtë projekt dhe kjo është një kënaqësi donë të thotë ky ishte një bashkëpunim i mirë në mes regjisorit, kompozitorit të muzikës, operatorit të dritës e kështu me radhë”, deklaroi Philip Boe, aktor nga Zvicra.

Yllka Mujo, anëtare e jurisë nga Shqipëria, tha se ky festival i dramës, këtë vit ka ofruar për shikuesit estetika të ndryshme teatrore që janë shfaqur.

“Këta që morën çmimin sot kanë qenë sidomos pjesa e fundit maja e këtij festivali që më vjen shumë keq meqë salla duhej të ishte plotë dhe të gjithë njerëzit të gjithë publiku do kishte dalë me një mentalitet krejt ndryshe për teatrin sepse ishte me të vërtet një inovacion, ishte një performancë e shkëlqyer e mrekullueshme”, u shpreh Yllka Mujo, përfaqësuese e trupit teatror të Shqipërisë.

Këtë vit për herë të parë në festivalin e dramës “Skupi Fest” është ndarë edhe çmimi për aktorin më të mirë, çmim ky I cili iu dha Samuel Finzit për rolin në shfaqen “Ditari i një të çmenduri” në regji të Hana Rudolf, e punuar sipas tekstit të Nikollaj Gogol dhe në produksion të Teatrit Kombëtar Gjerman. Edicioni i tretë i “Skupi Fest” përfundoi sot.

Gjatë tetë ditëve të fundit, në kuadër të këtij festivali janë realizuar shumë shfaqe teatrale.