“Big Brother”, largohet Valentina, hyn Renato

Bazuar në votat e publikut, Valentina ka lënë përfundimisht shtëpinë e “Big Brother”, duke hequr dorë nga çmimi i madh. Të shtunën mbrëma një konkurrent i ri ka hyrë në shtëpi. Ai është Renato nga Tirana, 23 vjeç.

Nata e spektaklit të tretë të “Big Brother” në “Top Channel” ka vijuar edhe një herë me emocionet dhe surprizat e javës, në qendër të së cilave kanë qenë ngjarjet më domethënëse, ku janë përfshirë konkurrentët e këtij edicioni: debati i Jetmirit me Valentinën dhe ndodhia e pazakontë e së enjtes, sëmundja e Gjimit. Këto kanë zënë vend gjatë spektaklit, ashtu si edhe mjaft episode të tjera.

Sëmundja largon Gjimin nga BB

Në spektaklin e së shtunës u tregua arsyeja e largimit të Gjimit nga shtëpia. Thjesht, sëmundja e papritur ka qenë shkaku që ai ka lënë përfundimisht shtëpinë, për ç’gjë është informuar edhe familja e tij. Gjimi, pasi është vizituar nga mjeku, është çuar urgjentisht në spital, ku i është nënshtruar një ndërhyrjeje kirurgjikale dhe ky fakt e ka larguar përfundimisht nga ky “reality show”. Me një klip, Vëllai i Madh e ka përshëndetur Gjimin për kontributin që ka dhënë gjatë qëndrimit në shtëpi. Ndërkaq, Gjimi ka falënderuar për këtë eksperiencë të bukur banorët dhe stafin e spitalit, nga ku u kërkon banorëve që ta mbajnë mend për momentet e bukura që kanë kaluar së bashku.

Eliminohet Valentina, hyn Renato

Valentina është konkurrentja e parë, e cila largohet me votat e publikut prej shtëpisë. Valentina e ka përjetuar në mënyra të ndryshme këtë kandidim. Me largimin e Valentinës, Vëllai i Madh ka vendosur që një tjetër konkurrent të bëhet pjesë e shtëpisë. Ai quhet Renato, të cilin e para e ka takuar Valentina. Ajo i ka dhënë atij disa këshilla për mënyrën se si duhet të sillet brenda shtëpisë.

Graciela dhe jeta e saj

Për shumë nga banorët ka ende detaje nga jeta që nuk janë zbuluar akoma. I tillë është edhe rasti i Gracielës, vajzës nga Shkodra. Jeta e saj nuk ka qenë e lehtë, sikundër edhe hyrja e saj brenda shtëpisë së “Big Brother”, për të cilën ka sakrifikuar shumë. Graciela ka humbur të ëmën dhe tani personi më i rëndësishëm për të është i ati, i cili edhe pse i verbër, është një njeri mjaft i veçantë. Gjatë një klipi mësohet më shumë për lidhjen e veçantë që ekziston mes të dyve. Përmes një klipi, Vëllai i Madh ka surprizuar Gracielën me një mesazh nga i ati. Më pas, në dhomën e rrëfimit, vajza nga Shkodra gjen edhe një surprizë. Një kornizë me një montazh fotosh nga më të rëndësishmet brenda shtëpisë, si dhe të familjes së saj ka qenë dhurata tjetër për të.

Humbasin provën e javës

Edhe kësaj jave, objekti i provës ka qenë Shqipëria. Atyre u është dashur të përgatisin një pije tradicionale, që ishte rakia dhe disa pjata tipike shqiptare. Gjithashtu, banorëve u është dashur të mësojnë dhe të interpretojnë këngë e valle tradicionale shqiptare. Rakia është provuar në studion e spektaklit, ndërsa banorët kanë interpretuar edhe një këngë popullore e pas saj edhe një valle. Me gjithë përpjekjen, ata kanë humbur provën dhe kështu iu është përgjysmuar buxheti i javës.