Përfundoi procesi gjyqësor lidhur me "Fondin Haradinaj"

Në Gjykatën e Qarkut në Prishtinë sot përfundoi procesi gjyqësor lidhur me transaksionet financiare në llogari të "Fondit Haradinaj". Milazim Abazi, ish drejtor i përgjithshëm i Kasabankës dhe Hashim Sejdiu, ish shef drejtor i filialit të Kasabankës në Prishtinë, janë shpallur të pafajshëm dhe janë liruar nga të gjitha akuzat. Jahja Lluka, shef i kabinetit të ish-Kryeministrit Agim Çeku, është dënuar me kusht, me 10 muaj burg dhe me 10.000 euro. Aktgjykimi i shpallur nga trupi gjykues, i cili përbëhej nga dy gjykatës të EULEX it dhe një gjykatës vendor, është marë pas pesë seancash gjyqësore, në të cilat janë paraqitur një sërë provash, dokumentesh e dëshmish lidhur me dyshimet e paraqitura nga prokurori.

Jahja Lluka ishte i akuzuar lidhur me mënyrën e deponimeve dhe tërheqjes së parave në llogarinë e "Fondit Haradinaj" në Kasabankë, Bankën e Re të Kosovës dhe Bankën Ekonomike. Sipas aktakuzës, ai kishte rënë ndesh me ligjin, duke deponuar dhe duke tërhequr shuma të mëdha parash, edhe në emër të personave të tretë. Por, Lluka ka thënë se të gjitha transaksionet e kryera prej tij në llogari të "Fondit Haradinaj" ishin kryer konform ligjit, në mënyrë transparente dhe në mënyrë të hapur për të gjithë të interesuarit. Abazi dhe Sejdiu akuzoheshin për mosraportim të transaksioneve financiare në llogarinë e "Fondit Haradinaj" në Kasabankë. Gjatë shqyrtimit kryesor para trupit gjykues u provua se me asnjë dispozitë ligjore ata nuk ishin të obliguar të merreshin me paraqitjen e transaksioneve financiare që konsiderohen të dyshimta. Po ashtu, u provua edhe asnjëri prej tyre nuk kishte kryer asnjë veprim që do të pamundësonte raportimin e transaksioneve financiare, siç parashihet me ligj.

Aktgjykimi i trupit gjykues të Gjykatës së Qarkut në Prishtinë lidhur me transaksionet financiare në "Fondin Haradinaj i jep fund të një procesi të gjatë gjyqësor, i cili kishte filluar para gati tre vjetësh. Ky proces kishte filluar nga gjykatësit e UNMIK ut, por ai iu la gjykatësve të EULEX it, pas disa seancave të ndërprera për arsye të ndryshme. "Fondi Haradinaj" ishte themeluar me qëllim të sigurimit të mjeteve për mbrojtjen juridike e ish kryeministrit Ramush Haradinaj, i cili ishte akuzuar nga Tribunali i Hagës. Në kohën e themelimit të këtij fondi, institucionet e Kosovës nuk kishin kompetenca të siguronin ndihmë juridike për mbrojtjen e zyrtarëve të lartë të vendit në gjykatat ndërkombëtare. Transaksionet financiare në llogari të "Fondit Haradinaj" në Kasabankë, të cilat ishin shpallur si "të dyshimta", ishin kryer në kohën që Bordi Drejtues dhe menaxhmenti i kësaj banke po zhvillonin negociata për shitjen e aseteve të bankës. Ish drejtoi i përgjithshëm i Kasabankës, Milazim Abazi, dyshon se ngritja e aktakuzës ndaj tij mu në këtë kohë është bërë me qëllim të pamundësimit të pjesëmarrjes së tij në këto negociata dhe me qëllim të uljes së vlerës së aseteve të bankës. Asetet e Kasabankës i janë shitur bankës sllovene "Nova Lublanska Banka NLB".