KON-i ndalon reklamimin e Milkas

Shumë adhurues të skive alpine dhe kërcimeve me ski do të habiten me faktin se garuesit gjermanë Martin Schmitt dhe Maria Riesch në Vancouver në helmetat e tyre nuk do ta kenë logon e Milkas. Kjo e fundit është e njohur për ngjyrat e saj, por Schmitt në Lojërat Olimpike Dimërore është i detyruar që të bart helmetën e bardhë, derisa ngjyrë tjetër duhet të kërkojë edhe Riesch. Arsyeja për këtë qëndrim të Komitetit Olimpik Ndërkombëtar (KON) ka të bëjë me ngjyrat të cilat mund të ndodhen në helmetat e pjesëmarrësve të Lojërave. Ngjyra vjollcë gjendet në listën e zezë të KON-it dhe për këtë arsye Schmitt ka vendosur për helmetën e bardhë me flamurin e Gjermanisë anash, ndërsa sipas fjalëve të tij këtë vendim e ka marr jo për shkak të ngjyrës, por për shkak të materialit. Në anën tjetër ende nuk dihet se çfarë helmete do të bartë Riesch kur në Vancouver tashmë pritet të startojnë garat e skive alpine.