“Ujëvarë drite në zemër”

Anton Nikë Berisha, shkrimtari dhe studiuesi i letërsisë, në 100-vjetorin e lindjes së Nënë Terezës, vjen në një rrëfim për këtë shqiptare të madhe, së cilës i ka kushtuar një pjesë të mirë të krijimtarisë së tij

Thotë se ka synuar që ta përjetësojë artistikisht veprën dhe botën shpirtërore të Nënë Terezës, sepse përmes artit, ato shqiptohen në mënyrë më thellësore, bëhen më jetëgjatë, për të mos thënë të përjetshme. Shkrimtari dhe studiuesi i letërsisë, Anton Nikë Berisha, shumë shpejt do të vijë për lexuesin shqiptar e italian me botimin e dytë të veprës “Ujëvarë drite në zemër”, nga shtëpia botuese “Argeta LMG”. Ndërkaq, libri është botuar edhe në gjuhën italiane, nën titullin “Cascata di luce nel cuore” nga “Luigi Pellegrini Editore” e Kozencës.

Një pjesë të mirë të krijimtarisë së tij autori ia ke kushtuar figurës së madhe të Nënë Terezës, që e dëshmojnë shtatë libra. Për idenë e interesimit në përkushtimin e këtij portreti të rëndësishme për shqiptarët dhe mbarë botën vetë autori është shprehur se midis të tjerash, është një fakt që heq peshë: nëna e Nënës Terezë, Dranja, ka lindur në fshatin Gramaçel që ndodhet në mes Gjakovës dhe Deçanit dhe 50 km larg vendlindjes së tij Dobërdolit. Ai ndër tjerash është shprehur se në vitet ‘90 të shekullit të kaluar, për disa muaj ka realizuar shumë punë paraprake për fillimin e hartimit të një romani kushtuar figurës së Nënës Terezës. “Romani duhet të kapte një kohë shumë të shkurtër: nga çasti kur Nëna ngrihet nga karrigia e rendit të parë, në sallën e mbushur me mysafirë të lartë, dhe drejtohet te foltorja për të thënë disa fjalë me rastin e pranimit të çmimit “Nobel”. Ndërsa ai shton se pas shumë vjetësh, ka marrë në dorë hartimin e romanit “Nëna e dritës”.