Një libër për artin muzikor...!

Ditë më parë, Xhevat Ismaili, profesor në Fakultetin e Edukimit në Gjilan, botoi librin e dytë me titull “Lojëra muzikore”. Libri në fjalë është një lloj materie e “veçantë” nga arti muzikor. Siç dihet, autori i librit, Xh. Ismaili, duke parë mungesën e madhe të lojërave muzikore, bukuria e pakrahasueshme, origjinaliteti i theksuar, dashuria e veçantë e fëmijëve për lojë, interesimi i edukatoreve dhe i arsimtarëve, i lindi dashuria për ta hartuar këtë lloj libri të veçantë për fëmijët e vegjël dhe për edukatoret dhe arsimtarët e kësaj fushe të dijes.

Librin ia botoi revista për çështje arsimore e pedagogjike “Shkëndija” ku , pothuaj, të gjitha tekstet e këtij libri janë të botuar në revistën në fjalë. Pra, është një libër me vlera të përgjithshme estetike për lojërat muzikore, të cilat jo vetëm interpretohen, por edhe studiohen duke u mbështetur në aftësitë psikofizike të kësaj moshe të njomë. Pra, libri i Xhevat Ismailit paraqet pjesën teorike e praktike të lojërave muzikore. Në anën tjetër, libri është një ndihmesë e madhe për edukatoret dhe arsimtarët të kësaj fushe për të realizuar kërkesat e planprogramit mësimor në kopsht parashkollor dhe në atë të arsimit fillor.

Libi është një lloj “abetare” për të vegjlit, ku me ritme të thjeshta bëjnë ushtrime e para për të qëndruar në këmbë. Këtu nuk ka vetëm tekst, por ka edhe vargje të këngëve të lehta të ilustruara me pentagrame, ku përgatiten mirë e mirë për tu realizuar lojërat, të cilat simbolizojnë bilbilat, fluturat, ku përmes këtyre lojërave, të vegjlit shprehin ndjenjat e tyre gazmore për gjithçka që i rrethon. Pra, është një libër i këndshëm për moshën e njomë, e cila, si e tillë rritet me lojën e me artin e muzikës.