Lamtumirë F1, bëj tifo për Alonson”

I përjashtuari “i bujshëm”, Flavio Briatore: Fernandon e kam mik. Ai dhe Hamiltoni janë më të shpejtët

Flavio Briatore është përjashtuar përgjithmonë nga veprimtaritë e organizuara nga FIA-s, për shkak të skandalit në Singapor, ku i kërkoi Pikes të përplasej me një makinë tjetër për të favorizuar fitoren e Alonson, me futjen në pistë të “makinës së shpëtimit”. Gjykata civile e hodhi poshtë këtë tezë, duke e shpallur të pafajshëm ish-drejtuesin e Renault-it. Gjithsesi, Briatore e ka mbyllur një e herë e përgjithmonë karrierën e tij me garat.

Tashmë jemi në vigjilje të garës së parë të F.1 dhe Flavio Briatore pas shumë vitesh nuk është më në bokse…

Do ta shoh garën në tv, duke ndjekur ata që njoh prej vitesh. Mbetem i pasionuar pas F.1, edhe pse do të kishte qenë më mirë ta kisha lënë në vitin 2006, pas titullit të dytë të Alonsos. Atëherë i kisha fituar të gjitha sfidat e mia dhe ndieja dëshirën për t’u marrë me diçka tjetër. Më pas, në vitin 2008, Alonso u kthye pas një sezoni të vështirë te McLaren dhe për miqësi preferova t’i qëndroja pranë. F.1 më ka dhënë shumë famë, njohje, kënaqësi.

Ju u larguat pas skandalit me Piken në Singapor. FIA iu ka skualifikuar përjetësisht dhe Gjykata e Lartë e Parisit e rrëzoi këtë vendim.

Me të drejtë. Kam kaluar dy muaj, gjatë të cilëve trajtohesha si kriminel. Vetëm unë e di se çfarë kam kaluar e si jam ndier. Më pas erdhi lehtësimi, edhe pse pas disa muajsh do të jetë apeli i kërkuar nga Federata. Jam i qetë, e kam bërë detyrën e komandantit të një anijeje që rrezikonte të fundosej, pra dhashë dorëheqjen. Unë mora përsipër përgjegjësinë morale të skandalit, por historia e vërtetë ende nuk ka dalë në shesh. Apeli më dha lirinë dhe krenarinë, jam mirë tani.
Eshtë krijuar ideja se ju jeni shkarkuar nga Renault.

Renault bëri minimumin që duhej të bënte, por nuk prisja shumë.

Çfarë keni bërë në këta muaj?

Atë që kam lënë pas dore në 17 vitet e fundit: kam kaluar kohë me familjen, miqtë, kam bërë gjëra të thjeshta si shëtitjet ose pushimet pranë detit. Kam qenë një muaj e gjysmë në Kenia duke medituar dhe duke u kujdesur për veten.

Le të flasim për makinat. Cilat janë favoritet e sezonit?

Skuderitë e zakonshme: Ferrari, McLaren, Mercedes, Red Bull.

Kush ka më shumë shanse?

Flas shpesh me Alonson. Më tregon se Ferrari është mirë këtë sezon dhe se ndihet mirë te ajo skuadër. Askush nuk është më i zoti se ai në menaxhimin e garës. Bën edhe fare pak gabime.

Pilotët më të mirë të momentit?

Alonso dhe Hamilton. Pastaj është Masa, që duhet të ketë konsistencë. Por është shumë i shpejtë.
Vjet dominoi Brawn me makinë në limitet e rregullores. Mund të ndodhë prapë?

Mendoj që Brawn ishte përtej (rregullores). Kishte shumë konfuzion në lidhje me difuzorët, sistemin kers, mbi gjithçka. ishte një kampionat i pazakontë, i parregullt. Shpresoj që ky i tanishmi të jetë më transparent.

Heqja e furnizimeve do të sjellë ndryshime?

Do të favorizojë pilotët më të zgjuar, që nuk do t’i prishin gomat. Pit stop do jenë spektakolarë, me ndalesa 2-3 sekonda në krahasim me 7 më parë. Përgjegjësitë e mekanikëve në ndërrimin e gomave do të rriten, por ky dihet që është sport ekipor.

A janë të drejta pikët për fituesin?

Sistemi i këtij viti e pengon skuderinë që e gjen formën më të mirë në mes të sezonit, pasi nuk mund të rekuperojë më. Botërori mund të mbyllet para kohe kështu.

Po kthimi i Shumakerit?

Do ta ketë të vështirë me një shok skuadre si Niko Rozberg. Jam skeptik për kthimet e të mëdhenjve. Nuk do të jetë e lehtë për të, por kthimi i tij e gjallëroi F.1.

Shumi me Beneton, që drejtohej prej jush fitoi dy botërorë. A keni biseduar më në momentet e vështira?

Jo. Kur mora vesh që do të kthehej, i dërgova një sms. M’u përgjigj duke më falënderuar.

Eshtë një F.1 që ka humbur skuadra të mëdha si Bmw dhe Toyota e ka tani skuadra shumë të vogla…
Po, mini skuadra që nuk e di a do t’ia dalin ta mbyllin sezonin. Dy janë skuderitë e mëdha, Ferrari dhe Mercedes. Sistemi është i sëmurë, kostot janë shumë të larta dhe nuk fitohen para për të justifikuar investimet. Nuk e shoh mirë të ardhmen po nuk u shkruan rregullat nga e para.

Nuk ka F.1 në të ardhmen tuaj, ndoshta si pronar skuadre?

E përjashtoj 100 për qind.

- Pra jeni i gatshëm të futeni në futbollin italian… për Juventusin?

Bëni shaka? Modeli i futbollit është edhe më keq se F.1. Do ta marr shtruar. Nuk kam nevojë t’i sajoj vetes një punë. Pas 1 ose 2 vitesh do të rifilloj të punoj.

Keni lënë edhe presidencën e Kuins Park Rejnxhërs, skuadra juaj e futbollit.

E bëra për të mos krijuar siklete për Federatën Angleze të Futbollit pas skandalit të Singaporit. Jam tërhequr, por kam ende aksionet e mia së bashku me Eklestonen dhe indianin Mittal.

Po me Eklestonen si shkoni?

Pas 20 vitesh kontakte të vazhdueshme është e vështirë të thuash që nuk je mik me të. Në kaosin që u krijua më ka ndenjur pranë.

Po Moslei?

Nuk e kam parë e as e kam dëgjuar më për të.
Do të bëheni baba…
Foshnja do të lindë pas disa ditësh. Mjekët thonë se është mashkull. Kam një ide për emrin, por gruaja Elizabeta është kundër. Duhet ta bind.
Ke një fëmijë tjetër me Klum.

Një vajzë, Leni. Eshtë pesë vjeçe dhe është adoptuar nga Seal, bashkëshorti i Heidit, një njeri i veçantë. Nuk e kam parë më Lenin, por jeta është e gjatë dhe do të shihemi sërish.

Çfarë këshillash do t’i jepnit birit tuaj, pasi të rritet aq sa mund t’iu kuptojë?

Nuk e di, por do ta çoj në shkollat publike, që të jetë i barabartë me të tjerët, siç ka qenë edhe për mua. Shoh se fëmijët e shumë miqve të mi janë të përkëdhelur dhe të bezdisshëm. Do t’i jap një edukim të mirë tim biri dhe kjo do të jetë puna ime e vërtetë vitet që vijnë. Larg F.1, larg njerëzve.

Zhan Todt: Briatore duhet të ndëshkohet

Bosi i Formulës 1, Zhan Todt, është i bindur se ish-drejtuesi i Renault, Flavio Briatore, do të ndëshkohet për rolin e tij në skandalin e garës së Singaporit. Briatore u pezullua nga FIA për rolin e tij në përplasjen e Nelson Pikesë në vitin 2008, por ky ndëshkim u rrëzua nga apeli. “Ne nuk mund të harrojmë se një makinë ka përplasur me qëllim një makinë tjetër dhe kjo nuk mund të jetë pa pasoja”, ka thënë Todt. Ai ka shtuar se FIA do ta apelonte çështjen.

Briatore e fitoi gjyqin në Gjykatën e Instancës së Lartë në Paris, sepse ish-presidenti i FIA-s, Maks Moslei, që kishte drejtuar seancën e ndëshkoi atë, duke vepruar si prokuror, avokat dhe juri. Vendimi gjithashtu ka hedhur poshtë pezullimin pesëvjeçar të drejtorit inxhinjerik të Renault, Pat Simonds, për rolin e tij në skandal. Gjykata vendosi se vendimi ishte ilegal, por FIA është përpjekur që të tregojë se vendimi i gjykatës franceze nuk e nxori të pafajshëm dyshen e Renault për komplotin e përplasjes së makinës. Todt ka thënë se FIA do të formonte struktura të reja, që e ndanin sektorin e hetimeve dhe të dënimeve brenda FIA-s.

Nik Krou, president i senatit të FIA-s, ka thënë se Todt ka miratimin e këtij organizmi për ta çuar deri në fund këtë çështje. Në një konferencë për shtyp me drejtuesit e FIA-s, Todt ka thënë se bosi i të drejtave komerciale të F1, Berni Eklestone, ka pasur një takim me Këshillin Botëror të FIA-s të enjten dhe është rënë dakord se India do të debutojë në kalendarin e F1 në vitin 2011. Gara do të mbahet në një pistë të re që po ndërtohet në periferi të Nju Delhit.

Eshtë njoftuar gjithashtu se FIA do të jetë anëtare e Agjencisë Botërore Kundër Dopingut (Wada), kurse Todt ka kërkuar futjen e rregullës 107%. Ky rregull, që ka vepruar në sezonet 1996 deri 2002, ka kërkuar që pilotët të arrijnë një kohë më të shpejtë në kualifikime sepse ndryshe do të dështojnë që të kualifikohen. Megjithatë, nuk pritet që ky rreg