Një popull në foto

Janë etërit e fotografisë shqiptare, mjeshtërit e vjetër dhe të vërtetë të saj. Sjellin portretet e burrave dhe grave shkodrane, dukagjinase, peizazhe nga jeta qytetare dhe e fshatit të veriut të Shqipërisë. Por nuk mungojnë as çaste të fiksuara nga momente të rëndësishme historike, siç është për shembull shpallja e Pavarësisë. Janë foto të Pjetër Marubit dhe Kolë Idromenos nga viti 1888 deri më 1913 që ekspozohen në Muzeun Historik Kombëtar. E quajtur “Portreti i një populli”, ekspozita prezanton 26 fotografi krejt origjinale dhe do të qëndrojë e çelur deri më 9 maj. E ndarë në tri seksione: “Grupe dhe Familje”, “Gratë” dhe “Burrat”, ekspozita vjen si pjesë e projektit “Bujaria e shqiponjave” të programit “Interreg III”, që mori përsipër restaurimin dhe stampimin të Fotetekës “Marubi” dhe restaurimi dhe shtypja e fotografive janë realizuar nga fotografi Gino Bleve, i cili ka kuruar edhe ekspozitën.