Labinot Gashi: Edhe i bukur, edhe luftarak

Është një nga djemtë më të pashëm në Zvicër, por është shqiptar dhe për këtë ndjehet krenar dhe flet në çdo vend, qoftë si kampion në sportin luftarak qoftë edhe si supermodel, sepse rrënjën e ka nga Peja e bukur.

Dëshira e madhe për të shëtitur në tërë botën e përforcon edhe dashurinë e tij që ka për modelizëm. Ky është Labinot Gashi, i cili vjen në një rrëfim ekskluziv për herë të parë në një media shqiptare, në gazetën “Kosova Sot”.

“Kosova Sot”: Kemi dëgjuar që po arrini sukses edhe në Zvicër, ka kohë që merreni me modelizëm?

Labinot Gashi: Me modelizëm kam filluar të merrem para tre vjetëve.

“Kosova Sot”: Keni nisur këtë rrugë në Kosovë apo në Zvicër?

Labinot Gashi: Me modelizëm më është krijuar mundësia të marr pjesë në një test shooting në Zvicër dhe më kanë thënë që kam potencial për të ecur përpara, madje papritur në një klub dikush më është afruar dhe më ka ftuar të bëj foto.

20 vjet në Zvicër

“Kosova Sot”: Sa vite ka që jetoni në Zvicër dhe për ju modelizmi është profesion apo hobi?

Labinot Gashi: Unë ka 20 vjet që jetoj në Zvicër dhe modelizmi për mua është më shumë hobi, pasi më pëlqen të vizitoj krejt botën, e me modelizëm i kam mundësitë. Ndërsa profesioni është marketing, pasi unë ende jam student në universitetin e Zvicrës, dhe ushtroj edhe profesionin si ekonomist, gjithashtu jam edhe sportist, jam në Ligën Nacionale të sportit luftarak “Taekwondo”, ku mbaj titullin “Champion Swiss 2010”.

“Kosova Sot”: Ju pëlqen më shumë t’ju njohin si sportist, apo si model? Ku fitoni më shumë?

Labinot Gashi: Në Zvicër mund t’i kombinoj sportin me modelizmin, sharmin dhe simpatinë ma ka dhënë Zoti, por për të pasur rezultate në sport me nevojitet shumë punë. Ndërsa pagesa më e madhe është me modelizëm dhe kur marr pjesë në ndonjë garë internacionale atëherë çmimi është më i lartë.

“Kosova Sot”: Kujton Labinoti ndonjë event?

Labinot Gashi: Po, kam qenë “Best Model of the World” në Bullgari, kam marrë pjesë në “Mister Central Swiss”, kam prekur pasarelat në Republikën Domenikane, në Milano, Monako, Nica e sapo jam kthyer nga Dubai.

“Kosova Sot”: Në të gjitha këto spektakle që merrni pjesë, ju prezantoheni si djalë nga Kosova?

Labinot Gashi: Mund të them se jam krenar që jam shqiptar, me mendje jam në vendlindje dhe me shqiponjë në zemër.

Rrënjët në Kosovë

“Kosova Sot”: A është e vështirë që një kosovar të fitojë dhe të jetë më i miri atje në Zvicër dhe a ka racizëm?

Labinot Gashi: Nuk kam pasur rast të përjetoj racizëm, normal që çdo komb do të ketë të vetin më të mirin, por këtu nuk ka lidhje se nga i ke rrënjët, por vetëm se çfarë karakteri je.

“Kosova Sot”: A do t’ju pëlqente që të ishit në Kosovë dhe të punonit si model?

Labinot Gashi: Pse jo, është vendlindja ime dhe rrënjët i kam në Kosovë.

“Kosova Sot”: Dhe, kjo rrënja juaj është nga cili vend i Kosovës dhe a ju mungon ky vend?

Labinot Gashi: Nga Peja i kam rrënjët dhe ky vend është si magnet për mua, që më tërheq çdoherë për të ardhur në Kosovë.

“Kosova Sot”: Atëherë i bie të themi që Peja i ka edhe djemtë e bukur, përveç vajzave?

Labinot Gashi: E kam dëgjuar edhe unë këtë fjalë, por për vajzat e di se janë të bukura.

“Kosova Sot”: E Labi dashurohet më shpejt me një vajzë të bukur shqiptare, apo me një vajzë të bukur të huaj?

Labinot Gashi: Njeriu rrallë e ka mundësinë të zgjedhë në cilin person të dashurohet, por preferoj shqiptaret që e flasin gjuhën e zemrës sime.

“Kosova Sot”: E femrat që kanë kaluar nga ju kanë qenë shqiptare?

Labinot Gashi: Ashtu siç i kam vizituar krejt pjesët e botës, ashtu i kam njoftuar edhe vajzat, por Zvicra, ku jetoj, është shumë internacionale dhe ka vajza nga çdo pjesë e botës.

Jeta afër detit

“Kosova Sot”: Jeni kampion në sportin luftarak dhe model i njohur, keni menaxher?

Labinot Gashi: Ka momente që i menaxhoj vetë, por kam edhe menaxherë në Zvicër, në Milano dhe në Gjermani.

“Kosova Sot”: Sipas jush, cila është femra më e bukur shqiptare?

Labinot Gashi: Marigona Dragusha dhe Angela Martini, që kanë marrë pjesë në “Miss World 2009” dhe “Miss World 2010”, të dyja më pëlqejnë shumë.

“Kosova Sot”: Po për pamjen tuaj cili ka qenë komenti më i bukur që keni marrë?

Labinot Gashi: Prej gjyshes, ajo i ka thënë nënës sime që 100 djem nëse i bën, si Labin nuk ke për të bërë më.

“Kosova Sot”: Dhe, në fund ku e sheh vetën Labi pas 20 vjetësh?

Labinot Gashi: E shoh veten në një shtëpi të madhe afër detit, me 10 fëmijë dhe përkrah një gruaje të bukur dhe inteligjente.

Intervistoi: M. GJOKAJ