Mehmeti e bën Malmon kampion të Suedisë

Sulmuesi shqiptar i Malmo FF, Agon Mehmeti sikur gjatë gjithë kampionatit edhe në xhiron e fundit vendimtare është shfaqur protagonist për skuadrën e tij duke e ndihmuar të shpallet kampione e Suedisë në futboll. Në ndeshjen e fundit, Malmo ka mposhtur skuadrën e Mjallby (2:0), kurse goli i dytë mban firmën e podujevasit. Mehmeti shënoi golin e dytë të skuadrës në minutën 45, kurse nga minuta e 70-të në lojë u inkuadrua edhe Dardan Rexhepi. Mehmeti ka shënuar 11 gola për Malmon.

Skuadra tjetër e cila ka luftuar për këtë titull deri në xhiron e fundit, Helsingborgu i Ardian Gashit (u aktivizua në 20 minutat e fundit) nuk arriti të mposht Kalmarin.