Laçi frenon blutë, Tirana vijon ngjitjen

Në tri ndeshjet e para, luajtur të shtunën, janë prodhuar dy rezultate shumë surprizë. Kështu, në stadiumin kombëtar “Qemal Stafa”, Dinamo kampione, udhëheqëse e kampionatit në vazhdim, i 72-ti në radhë, ka barazuar në mënyrë dramatike me Laçin mik, me rezultatin 3-3. Plot 6 gola të shënuar në një ndeshje tepër emocionuese, ku miqtë kurbinas e kanë bërë “me zemër” Dinamon, teksa kanë arritur të përmbysin përkohësisht avantazhin e hershëm të bluve, me golin e realizuar nga Emiljano Vila, që në minutën e 7-të. Por, përmbysjet në këtë sfidë nuk kanë munguar deri në fund të lojës, ku epërsia e fundit, e përkohëshme, e Dinamos, me rezultatin 3-2, ka gjetur barazpeshën e kurbinasve, që kanë vulosur edhe rezultatin final të këtij 90+4 minutëshi luftarak dhe mjaft të ethshëm, 3-3, duke dalë me një pikë të artë nga ndërkombëtari kryeqytetas. Të pakënaqur kanë dalë blutë, që kishin shansin të distancoheshin edhe më nga dy ndjekësit më të afërt, Skënderbeu dhe Flamurtari, që do të “përplasin brirët” me njëri-tjetrin një ditë më pas, të dielën, në Vlorë. Skuadra e Lacit është shfaqur mjaft e përgatitur dhe solide, me një shpirt të lartë gare, duke e vënë në pozitë të vështirë Dinamon. E cila, nga ana e vet, ka arritur të shënojë 3 gola, me anë të Vilës, Bakajt dhe Sefës, treshes së vet sulmuese, por po aq herë është ndëshkuar nga miqtë. Për Lacin kanë shënuar Mile, Kastrati dhe Kaja. Në këtë mënyrë, të dyja palët kanë ndarë nga një pikë, pas një loje shumë të bukur dhe të mbushur me emocione dhe ankth, deri në vërshëllimën e fundit të gjqtarit Albano Janku.