Dialogu Kosovë-Serbi nuk ka të bëjë me statusin e Kosovës

Ambasadorja e SHBA-ve pranë Kombeve të Bashkuara, Rozmari Di Karlo, ka thënë se dialogu Kosovë-Serbi nuk ka të bëjë me statusin e Kosovës, pasi pavarësia është kapitull i mbyllur, të cilin e ka konfirmuar edhe Gjykata Ndërkombëtare e Drejtësisë, ndërsa ka shprehur mbështetjen e vendit të saj për të ndihmuar Kosovën në rrugën drejt integrimeve euroatlantike. Duke përkujtuar se GJND-ja ka konfirmuar se pavarësia e Kosovës nuk është në kundërshtim me të drejtën ndërkombëtare, Di Karlo ka thënë se tash është koha për të lëvizur përpara dhe për zhvillimin e dialogut Kosovë-Serbis, i cili kërkohet edhe përmes rezolutës së miratuar nga Asambleja e Përgjithshme e Kombeve të Bashkuara më 9 shtator. Di Karlo ka çmuar lart mbështetjen e BE-së për zhvillimin e dialogut, për të cilin ka thënë se nuk ka të bëjë me statusin e Kosovës, e cila është shtet sovran, e njohur deri më tash nga 71 shtete të botës.