Policia me strategji të re për trafikun rrugor të Tiranës

Pas bllokimit dramatik të rrugëve të Tiranës një jave më parë, policia ndryshon taktike për menaxhimin e qarkullimit në kryeqytet. Bëhet e ditur se pas atij kaosi nëpër të gjitha rrugët e Tiranës, janë shtuar forcat e policisë që i bashkëngjitën policisë rrugore në pikun e trafikut.

Burimet thanë se patrullat e përgjithshme të policisë janë bërë pjesë e shërbimit të policisë rrugore çdo dite, nga ora 07:00 e mëngjesit deri ne 10:00 dhe më pas nga ora 14:00 deri ne 16:00, orare këto të identifikuara si koha kur trafiku rendohet për shkak të lëvizjeve të shumta duke sjellë më pas edhe bllokim të shumë segmenteve të brendshme në kryeqytet.

Në vijim të kësaj strategjie të re, shpjegohet se patrullat shërbejnë në varësi të rrugëve ku ndodh bllokimi dhe gjithmonë në mbështetje të policisë rrugore. Por nga ana tjetër mësohet se policëve rrugorë u është komunikuar një shtesë prej një ore në turnin e tyre, për të përballuar edhe fluksin në vijim që pritet të krijohet për festat e fundvitit, shtesë kjo që shpresohet të paguhet në fund të çdo muaji.

Një javë më parë në Tiranë u krijua kaos në trafik dhe Policia e Shtetit deklaroi se për zhbllokimin e situatës ishin hedhur në rrugë 700 forca mes të cilëve efektivë të komisariateve por edhe forca të ndërhyrjes së shpejtë. Bashkia e Tiranes dhe Ministria e Brendshme u përfshinë nga akuza të ndërsjella lidhur me përgjegjësinë e kësaj situate.