Rugova: Vetëm koalicioni ynë mund ta mëkëmb Kosovën

Prizren, 1 dhjetor - Në sallën e stërmbushur të sporteve “Sezai Surroi” në Prizren, me flamuj dhe dekore partiake, në mesditën e së mërkurës koalicioni paraelektoral në nivel të vendit, AAK- “Lista Ibrahim Rugova”- Bashkimi Demokratik, fushatën zyrtare e nisi me elektoratin prizrenas, për procesin zgjedhor të 12 dhjetorit. Nënkryetari i parë i AAK-së, Blerim Shala, theksoi se ky koalicion i fortë, po e nis epopenë e fitores nga Prizreni, një qendër kjo tejet domethënëse dhe e dinjitetshme e kombit. Ai, më tutje ka potencuar se ne do të punojnë shumë, me synimin e rikthimit të personit më të përshtatshëm dhe më popullor në postin e kryeministrit z. Ramush Haradinaj. Ndërkaq që përmes ovacionesh “Rugova- Rugova” në foltore doli edhe Ukë Rugova nga lista “Ibrahim Rugova”, i cili në referimin e tij, ka evokuar ditët e themelimit të LDK-së në vitin 1989, e cila me sukses u udhëhoq nga presidenti i amshueshëm i Kosovës, z. Ibrahim Rugova, njëherësh duke rikujtuar edhe vitin 2004, kur edhe ky i fundit bëri koalicionin me Ramush Haradinajn, me ç’rast Kosova përjetoi një udhëheqje kompetente. Andaj, ka theksuar Ukë Rugova, “përmes krijimit të koalicionit me AAK-në, do të fitojmë dhe kështu do ta vazhdojmë rrugëtimin e presidentit Rugova, nga që vetëm me fitoren e këtij koalicioni, Kosova sot mund ta përjetojë mëkëmbjen ekonomike, integrimin në Evropë dhe shtimin e punësimit të të rinjve”. Me brohoritje dhe frenetike nga simpatizantët u prit edhe kryetari i Bashkimit Demokratik Zafir Berisha, i cili, kryesisht u fokusua në apelin që më 12 dhjetor të votohet për këtë koalicion në nivel vendi, që është me numrin 43, ngaqë fitorja e kësaj lidhjeje politike, ëndrrat e qytetarëve të Kosovës për një jetë më të dinjitetshme, do t’i shndërrojë në realitet. Më pas folën edhe funksionarë të tjerë të këtij koalicioni, siç ishin Daut Haradinaj, Bislim Zyrapi etj. / Myrfet Shasivari

Share