Mijëra shtëpi të përmbytura në Shqipëri

Situata paraqitet e vështirë në veri të vendit, në Shkodër - në qytet apo dhe në komunat përreth, si pasojë e reshjeve të rëna gjatë natës, por edhe shkarkimeve nga kaskada e Drinit.

Drejtori i emergjencave civile, Leonard Olli, raportoi situatën më të fundit në disa prej lagjeve të qytetit të Shkodrës.

“Të përmbytura janë lagjet periferike, konkretisht është Bashallëku, janë Livandat, është Ajazma e Xhabia, pra janë një sërë pjesë të territorit të qytetit të Shkodrës, të cilat janë nën ujëra. Do të theksoja, gjithashtu, që rruga nacionale te Harku i Bërdicës është përsëri e pakalueshme për të gjitha mjetet, pra edhe për mjetet e ulëta, edhe për ato të lartat. Policia e shtetit ka bërë bllokimin e saj”, bëri të ditur Leonard Olli.

Të dhënat më të fundit të prefekturës Shkodër flasin për mbi 3 mijë shtëpi të përmbytura, 6 mijë të tjera gjenden nën kërcënimin e ujit, si dhe 1200 hektarë tokë të përmbytur.

Por, të dhënat ndryshojnë me shpejtësi nga ora në orë, për shkak të reshjeve të shumta që nuk premtojnë ulje të nivelit të ujit.

Operacionet e autoriteteve shtetërore janë përqendruar në evakuimin e banorëve, deri tani janë evakuuar 7944 persona, por paralelisht po asistohen me ndihmë ushqimore edhe nga ajri banorët që vazhdojnë të qëndrojnë në shtëpitë e tyre.

Vëmendja është përqendruar edhe në kaskadën e lumit Drin për të garantuar sigurinë e saj.