BE: Bisedimet Prishtinë Beograd, nga fundi i vitit

Prishtinë - Bisedimet ndërmjet Prishtinës e Beogradit, për siç vlerësohet çështjet teknike të interesit të përbashkët, nuk do të mund të fillojnë përpara krijimit të institucioneve të reja të Kosovës, që do të dalin nga zgjedhjet e jashtëzakonshme të dhjetorit të këtij viti. Zyrtarë të BE së thonë se nuk presin që bisedimet të fillojnë deri nga fundi i këtij viti, pavarësisht njoftimeve të mediave në Beograd për mundësinë e takimit të nivelit të lartë më 18 dhjetor. Por ata i thanë BBC së se po bëhen përgatitje në vazhdimësi për fillimin e dialogut, që është cilësuar si i rëndësishëm për paqen, qëndrueshmërinë dhe sigurinë në rajon. Prishtina e Beogradi kanë shprehur gatishmërinë e tyre për fillimin e bisedimeve, por të dyja palët nuk kanë hequr dorë nga qëndrimet e tyre për çështjet që do të diskutohen. Autoritetet serbe thonë se presin që në një periudhë të rihapet çështja e statusit të Kosovës për të arritur, siç thonë, një kompromis historik ndërmjet dy popujve, ndërkohë që udhëheqësit politikë në Kosovë kanë deklaruar se bisedimet do të zhvillohen vetëm në cilësinë e dy shteteve të pavarura dhe vetëm për çështjet e interesit të përbashkët.