Ikin reshjet, por duhet të vazhdojë evakuimi

Dita e 6-të e përmbytjeve edhe pse pa ndryshime të ndjeshme nga paraardhëset, shënoi ndërprerjen e reshjeve të shiut, të cilat ia lanë vendin diellit që të dielën shkëlqeu deri në muzg. Mëngjesi i ditës së djeshme e ka gjetur Shkodrën pa reshje, ndërsa shënohen ulje të ndjeshme të temperaturave. Gjatë orëve të natës të së shtunës, reshjet e shiut vijuan të dendura në të gjithë territorin e qarkut të Shkodrës, duke ndikuar në përkeqësim të situatës. Situata në lagjet periferike Xhabije, Tophanë, Ajasëm, Bahçallëk, dhe Salo Halili është në nivelin e 1 metër e 50 centimetra. Për pasojë akset rrugore në këto zona janë të kalueshme vetëm me varka dhe mjete të rënda.