Topi dhe Zonja e Parë presin një përfaqësi të grave të përndjekura gjatë periudhës së diktaturës komuniste

Presidenti i Republikës së Shqipërisë, Bamir Topi dhe Zonja e Parë, Teuta Topi, në kuadër të 20-vjetorit të ndryshimit të sistemeve në Shqipëri, pritën sot paradite në Presidencë një përfaqësi të grave të burgosura dhe të internuara gjatë periudhës së komunizmit, por dhe të periudhës së fashizmit, në shenjë respekti e vlerësimi për qëndresën, vetëmohimin dhe për mesazhet e paqes dhe kundër hakmarrjes – të dhëna para, gjatë dhe pas momentit të përmbysjes së diktaturës komuniste. Në këtë takim ishin të pranishëm edhe Kryetari i Shoqatës Mbarëkombëtare për Integrimin e të Burgosurve dhe të Përndjekurve Politikë, Adem Allçi, Sekretari i Përgjithshëm i kësaj Shoqate, Besim Ndregjoni, Kryetari i Qendrës Shqiptare për Rehabilitimin e Traumës dhe Torturës, Adrian Kati, ish-të persekutuar të tjerë, si dhe anëtarë të Kabinetit të Presidentit.Përfaqësia e grave ish-të persekutuara gjatë periudhës së diktaturës komuniste falenderuan Kreun e shtetit dhe Zonjën e Parë për pritjen e përzemërt dhe shprehën mirënjohjen për mbështetjen dhe vëmendjen e shtetit dhe të vetë Presidentit Topi për rehabilitimin e plotë të tyre në jetën shoqërore, për përpjekjet e vazhdueshme për nxjerrjen në dritë të të vërtetave të hidhura gjatë regjimit diktatorial, si dhe për vlerësimin e përkujtimin e veprës heroike të mjaft të dënuarve e të ekzekutuarve të këtij sistemi.