Shqipëria ka të ardhme

ryetarja e Kuvendit të Shqipërisë, Jozefina Topalli priti sot kryeministrin e Sllovenisë, Borut Pahor, dhe delegacionin qeveritar që e shoqëronte atë. Kryeministri i Sllovenisë, një personalitet me karrierë të gjatë politike në institucionet e BE, tha se ndihet i mrekulluar, në këtë vizitë të tij të parë, historike në Shqipëri. Kryetarja e Kuvendit duke falënderuar Kryeministrin slloven për vizitën, shprehu konsideratat e veçanta për mbështetjen e jashtëzakonshme që vendi i tij ka dhënë për heqjen e vizave dhe proceset integruese të Shqipërisë. Njëkohësisht Kryetarja e Kuvendit vlerësoi kontributin e veçantë të homologëve të saj parlamentarë sllovenë, aktualë dhe paraardhës, në këtë mbështetje ndaj vendit tonë.“Vizita juaj sot – u shpreh Kryetarja e Kuvendit, përkon me një datë historike për Shqipërinë, 20 Vjetorin e rrëzimit të komunizmit dhe fillimit të lëvizjes së lirë të shqiptarëve, pa viza në Evropë. Kryeministri Pahor, duke theksuar se prej kohësh planifikonte këtë vizitë në Shqipëri , e shtyrë për impenjime pune, tashmë po e realizonte, me një ndjenjë shumë të veçantë miqësie. “Shqipëria ka të ardhme. Ju përgëzoj për arritjet e jashtëzakonshme që keni bërë dhe që kanë transformuar këtë vend”, u shpreh kryeministri Pahor. Kryeministri slloven uroi shqiptarët për heqjen e vizave si një vendim të merituar dhe që shënon një hap të madh, për historinë e vendit tonë. Kryetarja e Kuvendit gjithashtu i shprehu Kryeministrit slloven , vlerësimin për mbështetjen e që po jep qeveria sllovene, në përballimin e situatës së emergjencës ne Qarkun e Shkodrës. Më tej biseda u përqendrua në çështjen e investimeve sllovene në Shqipëri, ku zonja Jozefina Topalli theksoi se, Shqipëria ka një rritje ekonomike pozitive pavarësisht krizës globale financiare dhe një klimë të favorshme biznesi, veçanërisht në sektorin fiskal. Share