Qeveria e Kosovës dënon vrasjen në Leposaviq

Qeveria e Republikës së Kosovës e dënon fuqishëm aktin kriminal të vrasjes së zyrtarit të Komisionit Komunal të Albanikut, Shefko Sallkoviq dhe plagosjes së zyrtarit tjetër të këtij komisioni, Edin Islamoviq. Ne vlerësojmë se ky është një akt qyqar dhe i papranueshëm për institucionet e Republikës së Kosovës dhe për qytetarët e Kosovës dhe kërkojmë nga organet përgjegjëse që të ndërmarrin hapat e duhur që akterët e këtij akti kriminal të përgjigjen para drejtësisë. Qeveria e Republikës së Kosovës vlerëson se këto akte kriminale në asnjë mënyrë nuk mund të ndikojnë në suksesin e procesit zgjedhor të 12 dhjetorit. Qeveria është e përkushtuar për të mbështetur Komisionin Qendror të Zgjedhjeve për mbajtjen e zgjedhjeve të lira, demokratike, transparente, me pjesëmarrjen e të gjitha komuniteteve. Ne jemi të bindur se ashtu si edhe në të gjitha zgjedhjet e mbajtura deri më tani, Republika e Kosovës, institucionet dhe qytetarët e vendit më 12 dhjetor para botës demokratike do të tregojnë pjekurinë e lartë politike, duke dërguar mesazhin e qartë të avancimit të proceseve demokratike në vend.