Stuhia godet verilindjen e Shqipërisë

Një stuhi e pazakontë mbrëmë rreth orës 21:00 ka goditur zonën verilindore të Shqipërisë duke shkaktuar mjaft probleme. Erërat e forta shoqëruar me reshje shiu dhe bore kanë sjellë defekte të mëdha në sistemin e furnizimit me energji elektrike. Një defekt i ndodhur në nënstacionin e Rezhepajve ka lënë Kukësin pa energji. E njëjta situate është paraqitur edhe në rrethin e Hasit ku për shkak të defekteve në linjat e transmetimit i gjithë rrethi ka vuajtur mungesën e dritave. Stuhia ka shkaktuar mjafte dëme në qytetin e Kukësit dhe zonën pyjore pranë. Shtylla elektrike, të ndriçimit dhe pemë janë rrëzuar në tokë.