Salihi “vallëzon” me golin, dopietë tjetër për Rapidin

Hamdi Salihi është “legjionari” i momentit, që po spikat me golat e tij të rregullt, por edhe me lojën cilësore që po zhvillon në radhët e skuadrës kryeqytetase të Austrisë, Rapidi i Vjenës. Dje, në ndeshjen e radhës të Bundesligës Austriake, sulmuesi ynë kuqezi ka realizuar dy gola në barazimin e përgjithshëm 3-3, mes Rapidit dhe Vacker Insbruck. Pikërisht në minutën e 17-të, Salihi do të hapte serinë e golave të kësaj ndeshjeje, për të realizuar edhe golin e barazimit 3-3 për të tijtë, në minutën e 66-të, duke evituar kështu një humbje në shtëpi të Rapidit të Vjenës. Me këtë dopietë, Salihi ngjitet në kuotën e 11 golave në këtë kampionat, në 18 ndeshje aktivizim me Rapidin, nga të cilat 8 i ka nisur si titullar dhe 3 si zëvendësues. Gjithashtu, ai ka dhënë 3 asiste për shokët e tij të skuadrës, ndërsa ka marrë po aq kartonë të verdhë.
Po dje, nga “legjionarët” tanë ka luajtur edhe lorik Cana. Gallatasaraji i tij është mundur 2-0 në shtëpi nga Gençlerbirliği i Currit, Balës dhe Harbuzit (asnjëri prej tyre nuk po aktivizohet, për arsye dëmtimesh dhe të tjera). Një situatë kritike e skuadrës së njohur të Stambollit, që po shkon nga humbja në humbje, ndërkohë që dje Cana ka luajtur me kohë të plotë. Të njëjtën gjë ka bërë edhe Kristi Vangjeli, në barazimin 1-1, që Arisi i tij ka marrë në transfertën e Olimpiakos Volos.