Mblidhet opozita e bashkuar: Betejën do e vazhdojmë në parlament e sheshe

Disa orë pas rrëzimit në Komisionin e Ligjeve të kërkesës së opozitës për ngritjen e komisionit hetimor për hetimin e zgjedhjeve të 28 qershorit të vitit të shkuar, akt të cilin kryetari i Partisë Socialiste Edi Rama e cilësoi si një dëshmi se kryeministra Berisha nuk kërkon jo vetëm të zgjidhë krizën politike, por si një mënyrë për të vjedhur edhe zgjedhjet vendore të majit 2011, kryesocialisti Edi Rama ka mbledhur në mbrëmje tryezën e opozitës së bashkuar për të vendosur lidhur me aksionin opozitar në vijim. Ndërkohë që mbledhja ka përfunduar, ishte Kordinatori i Opozitës së Bashkuar Preç Zogaj ai që zbardhi vendimet e tryezës duke deklaruar se pas refuzimit të zgjidhjes së ngërçit me transparencën e zgjedhjeve të shkuara tashmë opozita e bashkuar është më e vendosur se kurrë që ta shpalosë betejën e saj në parlament dhe në sheshe.