Në Golaj të Hasit, 1 i vdekur dhe 1 i plagosur nga shembja e ndërtesës

Një ngjarje e rëndë ndodhi sot në fshatin Golaj të Hasit, kur një person ka mbetur i vdekur dhe një tjetër ka mbetur i plagosur.
Policia lokale bëri të ditur se ngjarja ndodhi rreth orës 14:00 të ditës së sotme, kur dy personat po shembnin një banesë të vjetër në ish-sektorin e minierës për të përftuar hekurin.

Për pasojë, shtetasi Sali Dauti, 58 vjeç, ka gjetur vdekjen e menjëhershme, ndërsa i afërmi i tij, Ymerli Dauti, 33 vjeç, ka mbetur i plagosur.

Burimet sqaruan se të afërmit i kanë dërguar menjëherë në spitalin rajonal të Kukësit të lënduarin, i cili ndodhet jashtë rrezikut për jetën. Menjëherë forcat e policisë shkuan në vendin e ngjarjes, duke nisur hetimet. Paraprakisht thuhet se ngjarja ka qenë aksidentale për shkak të punës së kryer jashtë të gjitha standardeve.