Bjordi Mezini: “Nuk e mendoj martesën”

Është djali simpatik, por jo vetëm. Ajo që spikat dukshëm tek ai është talenti përveç të qenurit galant. E gjatë këtyre deklaratave dhe motivit që e çoi drejt showt gjigant, djali i talentuar e pa komplekse, bën për vete shumë adhurues. Bjordi nuk ka ndryshuar.

Është po ai që publiku e njohu në fillim. Na flet për Adelën, dashurinë që ndjen për të, nostalgjinë për Italinë, vendin ku u rrit deri në moshën 21 vjeç, si dhe pasionin e heshtur e të zhurmshëm për kinemanë. E të gjitha këto ai dëshiron t’i realizojë pranë asaj, të bukurës Adelë.

U mërzite nga “Kënga magjike”?

Normalisht kur hyn në një garë dëshira është të dalësh sa më mirë. Natyrisht te “Kënga magjike” nuk është se synoja të fitoja, por të them të drejtën edhe e prisja atë që ndodhi.

Si vendose të këndosh?

Në fakt ka qenë Piro ai që më dha idenë për të realizuar këngën me Adelën, sepse unë nuk e kisha menduar më parë. Adela shkoi tek ai për të kërkuar një këngë dhe më propozoi dhe mua të merrja pjesë në një duet që do ta realizonte ai.

Si t’u duk vetja si këngëtar?
Më mirë se ç’e prisja. Në shumë gjëra artistike që kam menduar të bëja në jetë në fushën e artit, të këndoja nuk e kisha çuar ndërmend. Por kur regjistrova këngën të them të drejtën u befasova nga vetja ime.

Çfarë ndodhi me planet e tua për regji?

Sapo kam filluar të punoj në një produksion televiziv, ku roli im është ndihmës regjisor. Kjo punë më pëlqeu sepse m’u duk si një hap i rëndësishëm për të nisur një profesion të tillë. Njëkohësisht, vazhdoj të realizoj klipet e mia amatore, për pasion më tepër.

Të mungon Italia?

Italia më mungon shumë, kuptohet kam shkuar kur isha vetëm dy vjeç dhe u ktheva 21. Nuk është se më mungon jeta që bëja atje, përkundrazi këtu ndihem më mirë sepse bëj atë që me të vërtetë dua. Por më mungojnë disa gjëra si bukuria e vendit, arti, pastërtia, rregulli, edukata e njerëzve. Janë ca gjëra që në Shqipëri sado kohë të qëndrosh nuk ambientohesh dot.
E ke menduar me Adelën të jetonit në Itali?

Këtë verë që qëndruam gjatë atje për pushime, e nuk mund ta fsheh që më pëlqeu dhe më shkoi mendja që edhe mund të jetoja atje me Adelën. Pse jo, të fillonim një shkollë. Por të them të drejtën nuk shkëputem lehtë nga Shqipëria. Jam gjysmë andej e gjysmë këtej. Në mënyrë figurative, mund të them, se ndihem emigrant edhe në Itali edhe në Shqipëri.

E kishe menduar që me Adelën do shkonte kaq gjatë?

Nuk i mendoj kështu gjërat. Nuk bëj parashikime, thjesht i jetoj. E përpiqem t’i jetoj maksimalisht. Të jetoj çdo të mirë pa e vrarë mendjen sesa do zgjasë.

Shumë menduan se lidhja juaj ishte thjesht “e sajuar” nga show i “Big brother” dhe nuk do të zgjaste shumë? Çfarë komenti ke?

Njerëzit ndonjëherë mendojnë gjëra të çuditshme. Ndaj bëj mirë që nuk i marr të gjitha seriozisht ato çfarë thonë apo çfarë dëgjoj, sidomos kur bëhet fjalë për mua. Unë ndihem shumë mirë. Si atëherë, në fillimin e lidhjes sime me Adelën.

Ke patur ndonjë moment dobësie?

Jo përsa i përket Adelës. Por ka momente që nga stresi, ngarkesa emocionale, mediatike e impenjimet kur bëhen të shumta më rëndojnë dhe mendoj a bëra mirë që e hodha këtë hap. Më vjen që të iki në Itali e të shkëputem nga e tëra ajo situatë e le të mbetet Adela këtu. (qesh)

E tepron ndonjëherë Adela?

Po. E tepron kur mërzitet shumë për gjëra të parëndësishme, ose të paktën që më duken mua të tilla. Por edhe kur pastron shtëpinë që e zgjat më orë të tëra.

Kush është më xheloz nga ju të dy?

Unë jam më xheloz. Jam si karakter, qoftë në dashuri, qoftë dhe në gjërat e mia. Por Adela është ajo që e shpreh më shumë ndonjëherë.

Kur është bërë xheloze Adela?

Adela mendon që të jesh galant e xhentil me femrat e tjera është e tepruar, se ndoshta sipas mentalitetit shqiptar duket sikur “ia luan” një femre kur sillesh në atë mënyrë. Në këtë pikë nuk biem dakord. Ajo nuk më kupton dhe unë nuk kam ndërmend të ndryshoj natyrën dhe sjelljen time, aq më tepër në këtë moshë.Bjordi e ke menduar martesën?

Pikërisht dje. E të tregoj sesi ndodhi. Ndodhesha në një lokal dhe m’u thye karrigia e u rrëzova. Kamarieri, që ishte një vlonjat, më tha se në Vlorë thonë se po u rrëzove dy herë nga karrigia ka ardhur momenti i martesës. Dhe aty më shkoi mendja për martesë. Normalisht nuk e mendoj. Ndihem mirë kështu. Martesa është një konfirmim i marrëdhënies. Në ndjenjë nuk ndryshon asgjë.

Pra nuk ke ndërmend të martohesh së shpejti?

Së shpejti. Por kur të martohem do jetë një dasmë spektakolare. Një party e një darkë e madhe, ku do të jenë të ftuar të gjithë miqtë e njerëzit e mi. Të premtosh para të gjithë njerëzve për dashurinë tënde dhe aty kupton që e hëngre, (qesh).

Po ti e ke premtuar para shumë teleshikuesve?

Unë i premtova Adelës. Fakti që ishin edhe kamerat aty ishte krejt rastësi.

Je më shumë mëkatar apo shenjtor?

Unë bëj mëkate në mënyrë shenjtore.