Kërcënon studenten, dënohet 3 milionë lekë gjobë

TIRANE - Gjykata e Tiranës ka krijuar një precedent interesant, duke dënuar me 3 milionë lekë të vjetra gjobë, një djalë të ri, që i kërkonte me ngulm e kërcënime të përditshme, një studenteje të martohej me të, jashtë dëshirës së saj.
Kjo histori nuk ka ndodhur para 50 vjetësh, por vetëm pak muaj më parë në Tiranë.

Sipas dëshmisë fillestare në denoncimin e saj në polici, vajza E. E., studente e Shkencave Sociale, ndodhej rastësisht në një dyqan në tregun çam, kur është takuar për herë të parë me djalin, që do të kthehej në makthin e jetës së saj për disa muaj me radhë. Ka patur një bisedë fare normale mes tyre, por ditët pas kësaj, nuk do të ishin më si më parë për vajzën. Sipas vajzës, gjatë ditëve në vazhdim, i pandehuri M. Xh., vazhdimisht i dilte përpara e i kërkonte që të ndalonte dhe kryente veprime që të tërhiqte vëmendjen e saj... Nuk përfundon me kaq.

Duke iu referuar vendimit të togave të zeza për këtë çështje, kishin kaluar vetëm dy javë nga takimi i dy të rinjve, dhe në familjen e vajzës paraqitet një person i njohur i familjes së djalit, (thënë ndryshe, daja i tij), i cili i kërkon babait të kallëzueses, se nipi i tij, e donte vajzën, dhe kërkonte që të fejohej me të.

Janë konsultuar babë e bijë me njëri-tjetrin, dhe familja e vajzës nuk ka rënë dakord për lidhjen e kësaj fejese, gjë e cila e ka nervozuar djalin. Në mënyrë sistematike e ka marrë në telefon kallëzuesen E. dhe i ka kërkuar takime, si dhe i ka bërë fillimisht deklarata të tipit, nëse nuk fejohet me të, "ai do të vriste veten".

Edhe pas kësaj, pretendenti për dhëndër nuk ia doli dot të bënte vajzën për vete, çka e detyron atë të ndryshojë stilin. Sipas shpjegimeve që vajza ka dhënë, djali, në shumë raste i është vënë nga pas, duke i thënë se ajo nuk mund të fejohej me njeri tjetër, përveç tij, pasi i pandehuri "do ta digjte me acid" (!) nëse ajo bënte një veprim të tillë.
"Bisedat" e këtij lloji janë bërë të përditshme, derisa vajza ka vendosur t'i drejtohet Komisariatit të Policisë Numër 3, për të bërë kallëzimin.

Ka rrëfyer të gjitha shqetësimet e saj nga i pandehuri dhe ka lënë në dispozicion të organit hetimor telefonin, duke treguar mesazhet e ardhura nga djali. Pas formulimit dhe kopsitjes së akuzës, kërkesëpadia u dorëzua në gjykatë, ku dhe u shqyrtua nga togat e zeza. Akuzat që kanë rënduar mbi djalin janë: "Shtrëngim ose pengim për të bashkëjetuar, ose për të zgjidhur martesën" dhe "Përdorim me keqdashje të thirrjeve telefonike".
Gjykata vendosi ta cilësojë fajtor të pandehurin, duke e dënuar me 3 milionë lekë të vjetra gjobë. Është e para herë që jepet një vendim i tillë, për një histori nga ato që ndodhin me qindra në Shqipëri dhe që, shpesh, konsumohen si vuajtje personale në heshtje.