Duka: Trajneri, i huaj dhe me banim në Shqipëri

Brenda 10 ditëve presidenti i FSHF-së, Armand Duka, premton trajnerin e ri të kombëtares

Largimi edhe zyrtarisht i trajnerit Ari Han, i hap rrugë gjetjes së zëvendësuesit të tij, i cili do ta drejtojë kombëtaren shqiptare në tri ndeshjet e mbetura të këtyre eliminatoreve për Botërorin Afrikan, por edhe gjatë edicionit të ardhshëm, për Europianin e vitit 2012. Tashmë është hapur ankandi për këtë post nga ana e FSHF-së, por akoma nuk është konkluduar për emrin më të përshtatshëm për të marrë drejtimin e Shqipërisë. Dje, presidenti i FSHF-së, Armand Duka, i cili ka qenë gjatë paradites në ambientet e federatës, ka zbardhur disa nga detajet që kanë të bëjnë me trajnerin.


Trajner i huaj për kombëtaren

"Do të jetë trajner i huaj, ashtu si kemi vepruar deri tani". Këto janë fjalët e presidentit të FSHF-së, i cili dje, me deklaratën e tij pas shkarkimit zyrtar të Ari Hanit, kishte lënë të kuptohej se mund të ishte edhe trajner shqiptar.

Federata ka pranuar se kanë mbërritur në tryezë disa emra, por Duka shprehet skeptik për sa u takon trajnerëve që janë afruar deri në këtë moment për kombëtaren shqiptare. "Janë disa emra, por për momentin asnjë prej tyre nuk na bind. Po punojmë për të gjetur njeriun më të përshtatshëm.

Deri tani nuk mund të themi me siguri se kush mund të jetë pasuesi i Hanit," - ka deklaruar kreu i FSHF-së. Tradita e trajnerëve të huaj, që nis që nga viti 2002, do të vazhdojë edhe me pasuesin e Hanin. Kombëtaren e Shqipërisë, gjatë erës "Duka", e kanë drejtuar katër trajnerë të huaj, ndërkohë që i është hapur rruga të pestit.


S'ka kohë, zgjidhet brenda 10 ditësh

Kombëtarja shqiptare ka një ndeshje shumë të vështirë më 6 qershor me Portugalinë në "Qemal Stafa", një motiv më shumë për të përshpejtuar procedurat për zëvendësimin e Hanit. Trajnerit të ri do t'i duhet kohë në fillim për t'u njohur me futbollistët, pastaj për të ndërtuar një grup të mirë për ta për përballuar me sukses këtë sfidë.

Sigurisht, nuk do të ketë presion për rezultatin, por do të jepen detyra të posaçme për të konsoliduar një skuadër që nuk ngjante si e tillë në ndeshjet e fundit eliminatore. "Ju siguroj që do të zgjidhet brenda 10 ditësh, pasi nuk mund të presim më gjatë për shkak të ndeshjes me Portugalinë. Trajneri i ri duhet ta fillojë sa më shpejt punën, pasi koha deri në këtë datë është shumë e shkurtër," - ka saktësuar Armand Duka.


Modeli "Rehagel", i duhuri për Shqipërinë

Kritikat e ashpra në drejtim të FSHF-së duket se nuk kanë rënë në vesh të shurdhër. Trajnerit që do ta drejtojë kombëtaren shqiptare do t'i vihen disa kushte, për të mos e pësuar si në rastin e Hanit. Kushti kryesor i presidentit Duka është qëndrimi i përhershën i trajnerit në Shqipëri, në mënyrë që ta njohë sa më mirë futbollin shqiptar, të bashkëpunojë me trajnerët e tjerë të ekipeve kombëtare dhe të zbulojë talentet e kampionatit shqiptar.

"Ai që do të vijë do të qëndrojë më shumë kohë në Shqipëri. Nuk do të vijë në Tiranë vetëm për grumbullimin e kombëtares, por do të jetojë këtu, për t'u njohur sa më mirë me ambientin. Janë shumë arsye pse trajneri duhet të jetojë në vendin tonë," - ka saktësuar presidenti i FSHF-së, Armand Duka.

Modeli që ka zgjedhur fqinja jonë, Greqia, është ai që ka zgjedhur edhe kreu i FSHF-së. Oto Rehagel jeton prej gati 10 vjetësh në Greqi, me të cilën është shpallur kampion Europe në vitin 2004. "Kërkojmë të marrim një trajner jo vetëm për një edicion, por për shumë kohë, në mënyrë që të mos e ndërpresë përgjysmë punën," - ka vijuar më tej Duka.