Duro: Bie Mavrova, më 10 qershor nis stërvitja në Korçë

Trajneri i korçarëve deklaron se faza përgatitore në Maqedoni s’do të zhvillohet, pasi grupi i futbollistëve nuk është akoma gati

“Deri më 10 qershor nuk jemi gati dhe kjo na detyroi që të rrëzojmë pistën e Mavrovës për të zhvilluar një pjesë të fazës përgatitore. Sot (dje) po kthehem në Shqipëri, pasi kam qEnë me pushime për disa ditë në Greqi dhe ditën e premte do të jem në Korçë, ku do të fillojmë, së pari, grumbullimin e skuadrës dhe të shikojmë në atë moment edhe grupin, i cili them se pas startit të stërvitjeve do të formohet gradualisht.”

Me këto fjalë e ka nisur prononcimin e tij të djeshëm trajneri i Skënderbeut, Shpëtim Duro. Tashmë skuadra ka të konfirmuar vetëm stërvitjet në Slloveni, nga data 26 qershor-6 korrik.

Grupi “Në fakt, e kisha menduar që gjithçka do të mbyllej për sa i përket merkatos deri më 10 qershor dhe skuadra do të udhëtonte më pas e qetë drejt Maqedonisë, por planet tona janë prishur dhe kjo lidhet me formimin e grupit.

Nëse do ta kisha grupin 100% gati, atëherë gjërat do të ishin ndryshe dhe nuk do të kishim probleme të tilla, por kjo tashmë është rrëzuar dhe mendoj që duhet të qëndrojmë në Korçë të paktën dy javë dhe më pas të mendojmë për fazën përgatitore në Maribor të Sllovenisë,” – ka shtuar trajneri Duro.

Provat “Do të kemi edhe futbollistë që do të vijnë në provë. Pjesa më e madhe e futbollistëve që kanë qenë pjesë e Skënderbeut në sezonin e kaluar nuk kanë nevojë për provë dhe ata tashmë janë deklaruar si lojtarë tanë, ndërkohë që e gjithë vëmendja do të përqendrohet tek ata lojtarë që do të vijnë për t’u provuar dhe pasi të mbërrijnë, më duhet t’i vëzhgoj për disa ditë dhe më pas të marr edhe vendimin përfundimtar.

Gjithçka do të thotë që Skënderbeu do të fillojë të marrë formën e duhur pas 10 qershorit në qytetin e Korçës, atje ku do të fillojë edhe grumbullimi,” – mbyll fjalët trajneri shpëtim Duro.

Bicaj joshet nga jashtë, por nuk lëviz

Nga të paktët që ka kaluar pushimet në Shqipëri është mbrojtësi shtatlartë Ditmar Bicaj, i cili vazhdon të jetë në pritje dhe nuk ka asnjë njoftim nga ana e drejtuesve korçarë për të firmosur edhe kontratën e re. Bicaj pohon se ka dy oferta të tjera nga jashtë vendit dhe është në pritje edhe të përgjigjeve nga ana e dy klubeve të huaja.

“Janë dy oferta të mira dhe nuk di çfarë të them më shumë se kaq dhe për disa arsye nuk mund t’i përmend edhe emrat e ekipeve. Nëse do të vendos për të qëndruar në Shqipëri, ka vetëm një skuadër ku mund të luaj dhe kjo është Skënderbeu. Në Korçë kam kaluar shkëlqyer për një sezon të tërë dhe mund të them se është një skuadër më shumë se korrekte në të gjitha drejtimet, aq më tepër që fitova edhe titullin me këtë skuadër,” – thotë Bicaj.

Lako nuk është më në planet e korçarëve

Eshtë krijuar jo pak konfuzion në radhët e korçarëve. U deklarua se të gjithë do të qëndronin, apo deri më 10 qershor do të mbylleshin të gjitha kontratat dhe pastaj do të iknin në Mavrovë për t’u stërvitur, por gjërat janë rrokullisur dhe tashmë asnjë nuk e di çfarë po ndodh të bardhekuqtë.

Dje, në telefonin e mbrojtësi korçar Stavrion Lako ka ardhur një thirrje nga drejtuesit, duke i deklaruar: “Nuk jem më në planet e Skënderbeut, kështu që je i lirë të gjesh ekip tjetër.” Natyrisht, Lako më shumë është habitur sesa mërzitur, sepse ai kishte marrë besimin pas fitimit të titullin kampion që do të ishte në ekip edhe për më tej, por gjërat kanë ndryshuar totalisht.

Pas Joliçit, Grabiçit dhe Markoviçit, i larguari i radhës tashmë është Lako. Por burime pranë klubit bëjnë të ditur se do të ketë edhe të tjerë që mund të largohen.

Orelesi-Ribeiro, mbërrijnë disa ditë më vonë

Dy futbollistët e huaj të Skënderbeut, nigeriani Nuredin Orelesi dhe braziliani Ribeiro Bernardo, kanë lajmëruar trajnerin Shpëtim Duro që do të mbërrijnë në Korçë disa ditë më vonë se data 10 qershor. Këtë lajm e ka pohuar ditën e djeshme vetë trajneri Duro:

“Orelesi dihet që është i grumbulluar me kombëtaren e tij dhe më ka marrë leje edhe për disa ditë të tjera. Ky lojtar menjëherë sapo të mbërrijë në Korçë, do të firmosë edhe kontratën e re. Pë rsa i përket Ribeiros, edhe me të kam komunikuar dhe më ka thënë se për disa arsye familjare, ai do të mbërrijë disa ditë më vonë.

Ne do t’i presim dhe nuk janë vetëm këta lojtarë që do të vijnë me vonesë, por ka edhe të tjerë dhe kjo më bindi të vendos për të shtyrë edhe fazën përgatitore në Mavrovë.”

Në provë do të jetë edhe një argjentinas

Përveç dy futbollistëve kroatë, një polak dhe një portugez, që tashmë dihet që do të vijnë në Korçë për t’u provuar nga trajneri Duro, pritet që së shpejti të mbërrijë në qytetin juglindor edhe një futbollist argjentinas. Flitet se ky lojtar do të vijë në Shqipëri në të njëjtin avion që do të udhëtojë edhe Rafael Soza, por akoma nuk dihet emri dhe çfarë roli luan ky futbollist i huaj.

Skënderbeu ka vendosur që pas datës 10 qershor të sjellë në Korçë futbollistë nga shtete të ndryshme të botës, madje flitet se të gjithë këta lojtarë që do të mbërrijnë janë futbollistë cilësorë, por ai që do të japë vendimi përfundimtar, nëse do të qëndrojnë apo jo, do të jetë vetëm trajneri Shpëtim Duro. Deri tani, siç dihet, me Skënderbeun kanë pranuar të jenë pjesë e tij vetëm Emiljano Vila dhe Nuredin Orelesi.

MBROJTËSI PRET OFERTËN KORÇARE
Vrapi me pushime në Itali: S’kam vendosur

Edhe pse në muaj mjalti, mbrojtësi i kombëtares mban njërin vesh nga telefoni

Mbrojtësi Endri Vrapi, që të dielën që sapo kaloi dogji edhe shaminë e beqarisë, nuk mundi të udhëtonte së bashku me kombëtaren tonë për të qenë pjesë e saj në ndeshjen e mbrëmshme në Bosnjë. Menjëherë pas dasmës së tij në kryeqytet, Vrapi ka udhëtuar drejt Italisë, atje ku është duke kaluar pushimet së bashku me bashkëshorten e tij:

“Nuk di çfarë të them, pasi për momentin jam me pushime dhe do të qëndroj në Itali deri në fundin e kësaj jave. Asgjë nuk mund të them për momentin edhe për të ardhmen, pasi menjëherë sapo të kthehem, do të ulem të bisedoj me presidentin Agim Zeqo dhe nëse do të biem dakord për kontratën e re, atëherë do të jem sërish pjesë e Skënderbeut.

Kjo do të thotë që jam në pritje të ofertës nga ana e korçarëve dhe shumë shpejt do të marr edhe vendimin tim përfundimtar për atë se ku do të luaj sezonin e ri,” - ka theksuar nga Italia mbrojtësi Endri Vrapi.
Henrikue pret njoftimin

Trajneri i përgatitjes atletike të Skënderbeu në sezonin e kaluar, Miguel Henrikue, me shumë mundësi do të jetë pjesë e stafit korçar edhe për sezonin e ri, gjë e cila është konfirmuar përpara disa ditësh edhe nga trajneri Duro, i cili ka thënë se gjithë stafi i sezonit të fundit do të vazhdojnë të qëndrojnë te Skënderbeu.

Por i ndodhur për momentin në Kaliforni të ShBA-së, Henrikue thekson se nuk ka asnjë njoftim dhe nuk di akoma se kur do të mbërrijë në Korçë. “Nuk di çfarë të them, pasi nuk kam asnjë njoftim nga drejtuesit e Skënderbeut se kur do të nisem për të qënë pjesë e ekipit.

Dëshira ime është që të qëndroj sërish të kontribuoj për Skënderbeun, por nuk kam asnjë njoftim dhe më duhet të pres një kontakt dhe më pas jam i gatshëm të udhëtoj drejt Shqipërisë,” - ka thënë trajneri i përgatitjes atletike, Henrikue.