Partizani i Beogradit interesohet për Andi Lilën

Kapiteni i bardhebluve, Andi Lila, kërkohet nga kampionia aktuale e Serbisë, klubi dërgon përfaqësues në Zenica

3 vjet është aktivizuar titullar në radhët e 24 herë kampionëve mbrojtësi i djathtë kavajas, Lila.

1 eksperiencë jashtë vendit ka provuar deri më tani, pikërisht 6 muaj tek Iraklisi në kampionatin helen, në sezonin 2006-2007.

3 trofe ka fituar me fanellën e bardhebluve, Andi, 1 titull dhe një superkupë, në edicionin 2008-2009 dhe një kupë në fund të sezonit që shkoi.

Kapiteni i skuadrës së Tiranës edicionin e shkuar të superiores, pas interesimit të vazhdueshëm të skuadrës rumune Dinamo e Bukureshtit apo edhe Arisit të Greqisë, pëlqehet shumë edhe nga kampionia në fuqi e Serbisë, Partizani i Beogradit. Sezoni që shkoi ka qenë shumë i suksesshëm për Lilën, pasi ishte një nga shtyllat e bardhebluve, por arriti që të bëhej edhe titullar në ekipin përfaqësues.

Lajmin për interesimin e Partizanit të Beogradit për mbrojtësin Lila, e kanë publikuar edhe edhe dy media serbe, konkretisht “Novosti. rs.” dhe “Sportske.net”.

Sipas asaj që thuhet në këto dy sajte serbe, drejtuesit e Partizanit të Beogradit kanë kohë që e vëzhgojnë Lilën, madje një investim për të afruar lojtarin shqiptar në gjirin e skuadrës së tyre do të ishte me të vërtetë një goditje në merkato.

Lila tashmë është në kulmin e karrierës, por luan shumë mirë jo vetëm në rolin e tij natyral si mbrojtës i krahut të djathtë, por edhe si shkatërrues, detyrë që i është besuar si në skuadrën e Tiranës ashtu dhe në përfaqësuese.

Madje drejtuesit e skuadrës së Beogradit, dje kanë dërguar njerëz, pjesëtarë të klubit për të ndjekur Lilën në ndeshjen që kombëtarja jonë zhvilloi dje në Zenica. Për sa i përket anës financiare, bëhet fjalë për një shifër të majme, madje rroga e Lilës mund të shkojë rreth 10 mijë euro në muaj.

Ofertat Gjatë këtij sezoni, për Andi Lilën kanë mbërritur edhe oferta konkrete nga skuadra të kampionateve të ndryshme të Europës. Kështu, fillimisht ka qenë interesuar Dinamo e Bukureshtit. Drejtuesit e skuadrës rumune, pasi janë bindur për formën e mirë që ka treguar mesfushori i kuqezinjve, Elis Bakaj, duan që të afrojnë në gjirin e vet edhe Lilën.

Por edhe skuadra e Arisit në kampionatin helen, pak muaj më parë shfaqi interesin për mbrojtësin e djathtë të bardhebluve. Kështu që nisur edhe nga insistimi i ekipeve të tjera, drejtuesit e skuadrës së Partizanit të Beogradit po i përshpejtojnë tratativat, në mënyrë që ta “rrëmbejnë” sa më parë dhe ta bëjnë të vetin Andi Lilën.

Tifozët I menjëhershëm ka qenë edhe reagimi i tifozëve të Partizanit të Beogradit, kur kanë mësuar se skuadra e tyre po bën ç’është e mundur që të afrojë shqiptarin Andi Lila. Në komentet që bëheshin, kishte tifozë që nuk e donin për faktin që është shqiptar, por edhe të tjerë që e mirëprisnin blerjen e Andi Lilës.

Nisur edhe nga fakti se kapiteni i Crvena Zvezdës, Ivan Gvozdenoviç, vitin që shkoi luajti te Tirana, madje u përkrah dhe gëzon respekt nga tifozeria bardheblu, ata e kanë vlerësuar ardhjen e shqiptarit, nisur edhe nga karriera dhe kualiteti i Lilës.

I. Lika i rikthehet stërvitjes, nigeriani Çarls nis provën

Pasditen e djeshme, në kompleksin “Skënder Halili”, nën urdhrat e dyshes Dimraj-Sengla janë vënë edhe dy lojtarë të tjerë. Kështu, portieri Ilion Lika dje u ka thënë “stop” pushimeve dhe është bashkuar me pjesën tjetër të skuadrës. Gjithashtu, për herë të parë në stërvitje me 24 herë kamponët ka dalë edhe mbrojtësi i Apolonisë, nigeriani Çarls Ofoyen.

Ky i fundit pritej që të bashkohej me skuadrën kryeqytetase qysh javën e shkuar. Ai do të provohet për disa ditë dhe më pas do të jenë drejtuesit ata që do të japin vendimin nëse është i vlefshëm apo jo.

Bala mungon, sot priten “legjionarët”

Ka dy ditë që në stërvitjen e bardhebluve mungon sulmuesi shkodran, Bekim Bala. Sulmuesi 20-vjeçar u bashkua me grupin disa ditë me vonesë, sepse ka qenë pjesë e ekipit Shpresa. Mirëpo Bala ka dy ditë që nuk duket në “Skënder Halili” dhe drejtuesit e Tiranës nuk japin asnjë shpjegim në lidhje me mungesën e tij në stërvitje.

Ndërkohë, sot pasdite pritet që të bashkohen me pjesën tjetër të skuadrës edhe tre lojtarët që ishin grumbulluar me përfaqësuesen për ndeshjen me Bosnjë-Hercegovinën, mbrojtësi Andi Lila dhe dy mesfushorët, Gilman Lika dhe Jahmir Hyka.