Tirana zyrtare përshëndet maturinë e qeverisë së Kosovës

Tirana zyrtare nëpërmjet Ministrisë së Punëve të Jashtme të
Republikës së Shqipërisë ka mirëpritur arritjen e marrëveshjes për
mirëkuptim të ndërsjellë mes Qeverisë së Kosovës dhe komandantit të
trupave të KFOR-it për administrimin e gjendjes së re, të krijuar në
pikat doganore 1 dhe 31 në veri të Kosovës..

Në deklaratën zyrtare, publikuar të premten vonë, përshëndetet
maturia e treguar nga Qeveria e Kosovës dhe veprimet e saj të
vazhdueshme për normalizimin e situatës.

“Shqipëria vlerëson kontributin e komandantit të forcave të KFOR-it
në Kosovë, gjeneralit Erhard Buhler dhe rolin e Bashkimit Evropian
përmes ndërmjetësuesit të saj Robert Cooper, në arritjen e kësaj
marrëveshjeje për tejkalimin e situatës së tensionuar në veri të
Kosovës”, theksohet në deklaratë.

“Kjo situatë shënon një realitet të ri, i cili duhet të jetë një
motivim për ta çuar më tej procesin e dialogut midis Republikës së
Kosovës dhe Republikës së Serbisë, me qëllim që në të ardhmen të gjitha
problemet ekzistuese midis dy vendeve, të zgjidhen nëpërmjet dialogut
dhe mirëkuptimit”, përfundon qëndrimi zyrtar i diplomacisë shqiptare pas
marrëveshjes së arritur.