PS-ja s’do të bashkëpunojë me LSI-në

Deputeti socialist, Gazmir Bizhga ka përjashtuar çdo mundësi
bashkëpunimi të Partisë Socialiste (PS) me Lëvizjen Socialiste për
Integrim (LSI).

“PS nuk ka nevojë të bëjë koalicion me pjesët e kësaj qeverie, por me
qytetarët, grupet shoqërore, njerëz që kanë autoritet në terren, me
profesorë, me njerëz të nderuar”, u shpreh Bizhga.



Ai ka komentuar edhe për ndryshimet në Kushtetutë duke i konsideruar
ato të nevojshme. Në këtë drejtim, nënvizoi se Kushtetuta nuk duhet parë
si element tabu, por duhet të garantojë institucione të pavarura,
ligjore dhe kushtetuese.

Sipas deputetit socialist të qarkut të Durrësit, ngritja e një
komisioni jopartiak, për të tërhequr vlerësimet e gjykimet, do të ishte i
domosdoshëm.



“Duhet të kemi vullnet politik, por palët duhet të ulen dhe më pas të
fillojë puna me konstitucionalistët. Presidenti, pavarësisht formës
sesi do të zgjidhet, duhet të jetë një president që të garantojë
paanshmërinë në detyrë, të jetë i aftë kur maxhornaca të shkelë
Kushtetutën, të ketë president që të mbrojë Kushtetutën”, u shpreh ai.