300 mijë lekë për 17 vite burg: Nuk gjeta rrugë tjetër veç drogës

“Qeveria nuk më dha lekët që meritoja, pasi kisha vuajtur në
komunizëm si i dënuar për agjitacion e propagandë. Kam vuajtur 17 vite
burg dhe qeveria më dha vetëm 3 milionë lekë të vjetra, për të gjithë
këtë periudhë. Me kaq pak para, nuk mund të jetoja. Kështu vendosa të
merrem me shitjen e drogës për të siguruar jetesën”. Ky është pohimi i
Haxhi Kurushit, 57 vjeçar i dënuar në mesin e viteve ‘70, me 17 vite
burg, për veprën penale të agjitacionit dhe propagandës, i arrestuar
këtë të shtunë në darkë për shitje dhe shpërndarje droge.
Kurushi, i cilësuar si “personazh i rrezikshëm” nga Gjykata komuniste
në vitet 70, u arrestua këtë fundjavë nga Zyra e Antidrogës e Policisë
së Tiranës. Ai u kap afër shtëpisë së tij në rrugën e Elbasanit, pranë
Ambasadës Amerikane, me një sasi prej 4 kilogramësh marijuanë të
presuar. Droga e përgatitur për shitje tek klientët e tij të zakonshëm,
pasi kishte mundur të krijonte një rrjet të tijin blerësish.

Sipas policisë droga vinte tek Kurushi, si dorë e dytë ndërsa ai e
blinte tek një mik i tij që besohet se arrinte ta siguronte nga
plantacionet në jug të vendit. Agjentët kishin afërsisht 3 muaj që e
vëzhgonin 57 vjeçarin nga Tirana. Burimet thonë se nga vëzhgimet e
kryera është vënë re se i arrestuari, shpesh ju ofronte ndonjë cigare
drogë falas edhe miqve dhe shokëve të tij, po ashtu ish- të dënuar
politikë, që zakonisht mblidhen përballë lulishtes së parlamentit ku
ndodhet selia e Shoqatës së ish- të Përndjekurve. Sasia e drogës që ju
gjend me vete 57 vjeçarit do tu dorëzohej dy blerësve për një shumë prej
rreth 2 milionë lekësh të vjetra.